O'zbekiston Dyusseldorfda 120 davlat orasida UCHINCHI bo'ldi

Yilning hisob bo'yicha ikkinchi "Katta Dubulg'a" musobaqasida sayyoramizning 5 qitasi 120 davlatidan jami 718 (427 erkak, 291 ayol) dzyudochi, ular qatorida 15 nafar o'zbekistonlik polvonlar ham turnir medallari hamda Tokio-2020 Olimpiadasi yo'lidagi muhim reyting ochkolari uchun tatamiga chiqishdi. 

Uch kunlik bellashuvlar yakuniga ko'ra kutilganidek Yaponiya terma jamoasi medallar jamg'arish bo'yicha umumjamoa hisobida birinchi o'rinni egalladi. Dzyudo vatani vakillari 8 ta oltin, 1 ta kumush va 1 ta bronza medali bilan yakka peshqadam bo'lishdi. Gruziya terma jamoasi 2 ta oltin, 1 ta kumush va 1 ta bronza medali bilan ikkinchi o'rinni egalladi. Agar +100 kg vaznda Guram Tushishvili oltin medalni qo'lga kiritmaganida, umumjamoa hisobidagi ikkinchi o'rin O'zbekistonga nasib etardi.

Davlat Bobonov (-90 kg) va Muhammadkarim Hurramov (-100 kg) tomonidan qo'lga kiritilgan 2 oltin medal O'zbekiston terma jamoasiga kuchli uchlikdan joy olish imkonini berdi. Bir nafardan chempionga ega Franciya va Kanada terma jamoalari beshlikni yakunlab berishdi. Aynan mana shu 5 davlat sportchilariga musobaqaning oltin medallari nasib etdi. 

O'n to'rtta davlat terma jamoalari kamida bittadan kumush, 22 mamlakat dzyudochilari esa kamida bitta bronza medaliga ega bo'lgan. Qolgan 98 davlat delegaciyalari ortga medalsiz qaytishgan.