O'zbekiston Kubogining tantanali ochilish marosimidan FOTOREPORTAJ

Bugun musobaqaning ikkinchi kuni.

Biroz avval murosasiz kurashlar ostida davom etayotgan mamlakat kubogining tantanali ochilish marosimi o'tkazildi. Tadbirda Xorazm viloyati hokimning Turizm va sport masalalari bo'yicha o'rinosari Botir Saidov, Urganch shahri hokimi Oybek Xolboev, viloyat dzyudo federaciyasi raisi Ortiq Polvonov, terma jamoa bosh murabbiyi Ilias Iliadis va boshqa mutasaddilar ishtirok etdilar.     

"Avvalo, Urganch shahriga xush kelibsizlar! Uch kun davomida jami 557 nafar dzyudochi 14 ta vazn toifasida medallar uchun kurash olib boryapti. Bellashuvlar murosasiz kechayotganiga hammamiz guvoh bo'lib turibmiz. Bahslarni 30 nafar tajribali hakamlar boshqarib borishmoqda. Ularga ham rahmat aytmoqchiman. Barcha qatnashchilarga zafar yor bo'lib, tatamida eng kuchlilar g'alaba qozonsin", - dedi B.Saidov.  

"Assalomu alaykum, qadrli mehmonlar, musobaqa ishtirokchilari. Aziz yurtdoshlar! Sizlarni sharq gavhari hisoblanmish qo'hna Xorazm viloyati zaminida ko'rib turganimizdan behad xursandmiz. Xush kelibsiz, qadamingizga hasanot! Avvalo, barcha ustozlarimiz, mehri daryo murabbiylarimizni kuni kecha yurtimizda keng nishonlangan 1 oktyabr – O'qituvchi va murabbiylar kuni bilan muborakbod etamiz. Mashaqqatli va shu bilan birga sharafli faoliyatingizda yangi omad, zafarlar yor bo'lsin!", - dedi O.Xolboev. 

Tantanali ochilish marosimida uzoq yillardan beri mamlakatimiz, xususan Xorazm viloyati dzyudosi rivojiga hissa qo'shib kelayotgan faxriylarimiz - Sabulla Kuryazov, Komiljon Ibragimov, Ikrom Ataev, Mahmud Ortiqov, Husinboy Meyliev esdalik sovg'alari bilan taqdirlanishdi. Sovg'alarni Ilias Iliadis, Ramziddin Saidov, Rio Olimpiadasi sovrindori Diyorbek O'razboev, jahon chempionati sovrindori Gulnoza Matniyazova topshirdi. 

SHuningdek, 1 oktyabr – O'qituvchi va murabbiylar kuni munosabati bilan O'zbekiston dzyudo federaciyasi tomonidan bir guruh faol murabbiy va hakamlarimiz ham taqdirlanadi.