O'zbekiston MOQ prezidenti dzyudochilar bilan uchrashdi FOTOGALEREYA

Xabaringiz bor, Rustam SHoabdurahmonov Tokio-2020 Olimpiadasiga muhim reyting ochkolari hamda bevosita licenziya taqdim etuvchi turnirlarga tayyorgarlik ko'rayotgan sportchilarimiz bilan uchrashib kelmoqda. Ana shunday tadbirlardan biri O'zbekiston dzyudo federaciyasida o'tkazildi. 

Dzyudo federaciyasi qoshidagi shinam sport zalida o'tgan samimiy ruhdagi uchrashuvda MOQ rahbari terma jamoamiz azolari, murabbiylar bilan dildan suhbatlashdi, ularning tayyorgarligi, kayfiyati bilan qiziqdi. Qiynayotgan muammo yoki kamchiliklar bormi, barini surishtirdi. 

"Barchamiz uchun o'ta masuliyatli davr boshlanmoqda. Ostonada to'rt yillikning eng muhim musobaqasi - Olimpiada turibdi. Ertaga bugunni qaytarib bo'lmaydi. SHu boisdan ham har bir sportchi shu men uchun berilayotgan so'nggi imkoniyat, yo bugun yoki hech qachon degan shior, talab bilan katta maydonga chiqsa, o'ylaymanki, hammasi yaxshi bo'ladi. Sizlarni qanday muammolar qiynayapti? Federaciya rahbariyati, Milliy olimpiya qo'mitasi barcha sharoitlarni muhayyo qiladi. Sizlardan faqatgina Olimpiada licenziyasini qo'lga kiritish va bevosita Tokioda munosib tarzda ishtirok etish talab etiladi", - dedi R.SHoabdurahmonov.

O'z o'rnida dzyudochilar ham davlatimiz tomonidan berilayotgan etibor, bu g'amho'rlikka yuqori natijalar bilan javob qaytarishlarini, buning uchun bor imkoniyatlarini ishga solishlarini takidlashdi.

Bir soatga yaqin davom etgan do'stona ruhdagi uchrashuv so'nggida Rustam SHoabdurahmonov yilning dastlabki IJF musobaqasi - Tel-Aviv Gran-prisida yurtimiz sharafini himoya qiladigan dzyudochilarga omad tiladi.