O'zbekiston Olimpiya o'yinlarida: Atlanta-1996

“O'zbekiston Olimpiya o'yinlarida” nomli yangi loyihamizda mamlakatimizning 4 yillikning eng nufuzli musobaqasidagi ishtiroki haqida birma-bir eslab o'tamiz. Bu borada dastlabki sahifamiz Atlanta-1996 Olimpiadasi bo'ladi.

Mamlakatimiz mustaqillikka erishganidan so'ng ishtirok etgan ilk yozgi Olimpiya o'yinlari 1996 yil AQSHning Atlanta shahrida o'tgan XXVI yozgi Olimpiya o'yinlaridir. Ushbu Olimpiadaning ochilish marosimida mustaqil davlatimiz bayrog'i ham jahon mamlakatlari orasida hilpiray boshladi.

Ochilish marosimi

Darvoqe, Atlanta-1996 Olimpiadasining ochilish marosimi haqida gap ketar ekan, bir qiziq voqeani eslab o'tish ham o'rinli. Odatda mamlakatlar paradida eng kuchli hayqiriq mezbon delegaciya chiqib kelganida eshitiladi. Biroq Atlantada AQSHdan tashqari Gruziya davlatining ham nomi elon qilinganida mahalliy tomoshabinlar kuchli qarsaklar va qo'llab-quvvatlashlari eshitilgan. Xo'sh, nega bunday? Malumki, Atlanta shahri AQSHning Jorjiya shtatida joylashgan. Gruziya davlatining ingliz tilidagi talaffuzi ham ushbu shtatniki bilan bir xil. SHubhasiz, mahalliy xalq uchun marosimda o'z shtatlarini eshitish ancha yoqimli.

Ilk medallarimiz

Olimpiya o'yinlarida -86 kilogramm vazn toifasida ishtirok etgan mashhur dzyudochimiz Armen Bagdasarov yozgi Olimpiya o'yinlari tarixida ilk medalimizni mamlakatimiz hisobiga taqdim qilgani bilan ahamiyatli.

SHuningdek, bokschimiz Karim To'laganov -75 kilogramm vazn toifasida bronza medaliga sazovor bo'lgan. SHu tariqa mustaqil O'zbekiston uchun ilk yozgi Olimpiya o'yinlari 1 ta kumush va 1 ta bronza medallari bilan yakunlangan.