O'zbekiston va Turkmaniston: o'zaro hamkorlik muhokama qilindi

Onlayn-konferenciyada O'zbekistonning Turkmanistondagi favqulodda va muxtor elchisi Akmaljon Kuchkarov, Turkmanistonning O'zbekistondagi elchisi Yazguli Mammedov, O'zbekiston MOQ Bosh kotibi Oybek Kasimov, Turkmaniston MOQ Bosh kotibi Azat Muradov va ikki Milliy olimpiya qo'mitalarining tegishli departament vakillari ishtirok etishdi.

Uchrashuv davomida mavjud ikki taraflama hamkorlik Memorandumiga muvofiq pandemiya tugagach, o'zaro o'quv-yig'in mashg'ulotlari o'tkazish, sport farmakologiyasi va tibbiyoti bo'yicha o'zaro hamkorlik masalalari muhokama qilindi.

Turkmaniston tarafi O'zbekistonda anchayin rivojlangan sport turlari – boks, dzyudo, og'ir atletika, sport kurashlari bo'yicha birgalikdagi o'quv-mashg'ulot yig'inlarini tashkil etish maqsadga muvofiqligi va hozirgi kundagi pandemiya sharoitida sportchilarimiz sport holatini qanday ushlab turganliklari bilan qiziqdi va bu bo'yicha O'zbekiston tarafidan batafsil malumotlar olindi.

Xabaringiz bor, 2017 yili Turkmaniston poytaxti Ashxobod shahrida Yopiq inshootlardagi Osiyo o'yinlari yuqori darajada tashkil etilgan edi. Ushbu musobaqada orttirilgan boy tajribadan foydalanib, 2025 yili O'zbekistonda o'tishi rejalashtirilayotgan yoshlar o'rtasidagi Osiyo o'yinlarida Turkmaniston tarafi o'z yordamini ayamasligi borasida ham suhbatlashildi.

Takidlab o'tish joiz, yuqoridagi o'yinlarni tashkil etish asnosida Ashxobod shahrida juda yaxshi sport infratuzilmasi yaratildi. Sportning qator turlari bo'yicha jahon standartlariga javob beradigan sport inshootlari barpo etildi. Suv sport turlari, velotrek majmuasi dunyodagi sanoqli davlatlarda mavjud sport obektlaridan hisoblanadi. Ana shu inshootlarda birgalikda musobaqalar, o'quv-mashg'ulot yig'inlarni o'tkazish har ikki taraf uchun ayni muddaodir.

Malumot uchun, O'zbekiston Milliy olimpiya qo'mitasi yuqoridagi kabi qator mamlakatlar Milliy olimpiya qo'mitalari bilan yaxshi aloqalarni yo'lga qo'ygan. Rossiya, Xitoy, Janubiy Koreya, Turkmaniston, Yaponiya davlatlari bilan ikki taraflama hamkorlik bo'yicha memorandumlar mavjud. Hozirgi kunda Litva, Ozarbayjon, Qozog'iston, Vengriya, Irlandiya, Quvayt davlatlari bilan o'zaro hamkorlik bo'yicha memorandum va kelushuvlarga erishish bo'yicha amaliy ishlar olib borilmoqda.