O'zbekiston velosiped sporti federaciyasi bilan onlayn mashg'ulot o'tkazildi

Mashg'ulot davomida federaciya Bosh kotibi Kozim O'rinboyxo'jaev hamda olimpiya terma jamoa murabbiyi Ruslan Nurtdinov sportchilarimizning karantin davrida qanday sharoitda shug'ullanishayotgani haqida batafsil tushuntirib berishdi. SHuningdek, yuzaga kelgan murakkab vaziyatga qaramasdan, mana shunday kunlarda velosportchilarimiz zarur inventarlar bilan o'z vaqtida taminlangani uchun hukumatimiz va sportimiz rahbariyatiga o'z tashakkurlarini bildirib o'tishdi.

O'z navbatida MOQ prezidenti Rustam SHoabdurahmonov sportchilarimizni yanada matonatli va chidamli bo'lishga chorlab, hukumatimiz bizni har tomonlama qo'llab-quvvatlab turishini takidladi.

«SHaroitlarning barchasi siz sportchilar uchun. Hukumatimiz tomonidan karantin uchun zarur chora-tadbirlar o'z vaqtida ko'rildi va biz bu kunlarni tobora ortda qoldirmoqdamiz. Tushunaman, velosportchilar uchun shosseda shug'ullanishning o'z o'rni bor. Sizlarga xushxabar tariqasida shuni aytishim mumkinki, tez orada magistral yo'llarda shug'ullanish uchun ham rasmiy ruxsat beriladi. Lekin ungacha yana ozgina chidashingizni so'rab qolamiz», – deydi Rustam SHoabdurahmonov.

Onlayn mashg'ulot davomida MOQ rahbariyati tomonidan karantin kunlaridan keyin velosiped sportini yurtimizda yanada rivojlantirish, Olimpiyachilarimiz va asosiy terma jamoamiz uchun xalqaro musobaqalar, o'quv-mashg'ulot yig'inlarini tuzib chiqish masalalarini atroflicha ko'rib chiqish bo'yicha tegishli ko'rsatmalar berildi.