O'zbekistondagi birinchi veloyo'lak foydalanishga topshirildi

Mazkur xayrli ish O'zbekiston Ekologik harakati, Evropada xavfsizlik va hamkorlik tashkilotining O'zbekistondagi loyihalari koordinatori va Namangan viloyati hokimligi hamkorligida barpo etildi.

Islom Karimov shohko'chasi bo'ylab barpo etilgan veloyo'lak ochilishi munosabati bilan unda “SHahrimizni birgalikda obod qilaylik!” shiori ostida dastlabki velomarafon o'tkazildi. Mazkur akciyada parlamentimiz azolari, ekoharakat faollari, EXHTning O'zbekistondagi loyihalari koordinatori vakillari, keng jamoatchilik, velosportchilar, jurnalistlar ishtirok etdi. 

Viloyat hokimligining masul xodimi Azamat Abdurahmonov, Oliy Majlis Qonunchilik paltasi deputatlari Sadirjon Jakbarov, Xayrullo G'afforov, EXHTning O'zbekistondagi loyihalari koordinatori Jon Makgregor so'zga chiqib, bugungi kunda transport vositasi sifatida velosipeddan foydalanishni targ'ib qilish va joriy etish borasida ko'rilayotgan chora-tadbirlar ham ekologik muammolarni kamaytirish va uning salbiy oqibatlari oldini olishga qaratilgan ezgu maqsadlardan biri ekanini takidlashdi. 

Velomarafon ishtirokchilari “Do'stlik” savdo-sanoat kompleksi maydonidan “Yoshlar bog'i”gacha bo'lgan 5 kilometrlik masofani bosib o'tdi. Akciya ishtirokchilarini yo'l bo'ylab aholi va yo'lovchilar qo'llab-quvvatlab turdilar. 

Akciya doirasida O'zbekiston Ekologik harakati va EXHTning O'zbekistondagi loyihalari koordinatori tomonidan 80 ta velosiped mehribonlik uyi, maktab-internat, oliy o'quv yurtlari, mahalla fuqarolar yig'inlari, ekologiya, tibbiyot sohasida faoliyat yuritayotgan nodavlat notijorat tashkilotlari kabi ijtimoiy muassasalarga sovg'a qilindi.

Tadbirda Namangan shahridagi 26-sonli Mehribonlik uyi tarbiyalanuvchilarining mavzuga doir rasmlar tanlovi o'tkazilib, faol ishtirokchilarga diplom, esdalik sovg'alari topshirildi. Taniqli sanatkorlar va yosh istedod sohiblari ijrosidagi koncert dasturi barchaga xushkayfiyat ulashdi. 
 

Oqilxon DADABOEV