O'zDJTSU bilan onlayn musobaqalar o'tkazish masalasi muhokama qilindi

Mazkur usul orqali musobaqalarni qumsayotgan sportchilarga motivaciya berish, ularning bo'sh vaqtlarini maroqli o'tkazish va bu orqali pandemiya davrida ham sport ommaviyligini oshirish bosh vazifa bo'lib turibdi. Bugun ZOOM platformasida “Mini sport musobaqalarini o'tkazish, innovaciya va O'zbekiston Davlat jismoniy tarbiya va sport universiteti bilan doimiy hamkorlik” mavzusida vebinar tashkil qilindi. 

Unda MOQ prezidenti Rustam SHoabdurahmonov, shuningdek, Jismoniy tarbiya va sport vazirligi mutasaddi vakillari, O'zDJTSU rahbariyati, MOQ qoshidagi innovacion markaz professorlari va sport faxriylari ishtirok etishdi. Yig'ilishda MOQ rahbari hozirgi murakkab vaziyatda onlayn musobaqalarning ahamiyati ne chog'lik muhim ekaniga alohida to'xtalib o'tdi.

“Hozirda Jismoniy tarbiya va sport vazirligi bilan asosiy terma jamoalarimiz uchun o'quv-mashg'ulot yig'inlarini o'tkazish bo'yicha Vazirlar Mahkamasi va Respublika maxsus komissiyasidan ruxsat oldik. Hukumatimizning bizni shunday davrda qo'llab-quvvatlayotgani, sport rivoji uchun ko'rsatayotgan yordami uchun minnatdorchilik bildiramiz. Hozir butun dunyoda vaziyat murakkab. Sizlarda boy tajriba bor. Undan unumli foydalangan holda sportimizni shunday davrda ham rivoj topishiga hissa qo'sha olamiz. Sportchilarimizga motivaciya berish uchun mahalliy onlayn musobaqalar o'tkazish dasturini birgalikda ishlab chiqaylik. Zero, hozir butun dunyo onlayn tizimga o'tmoqda”, – dedi Rustam SHoabdurahmonov.

Onlayn yig'ilish davomida tegishli mutaxassislar tomonidan innovacion markaz faoliyatini yanada rivojlantirish, atletlarimizning sport formasini nazorat qilib borish, onlayn musobaqalarni tashkil qilishda jahon tajribasidan foydalanish mavzularida ham atroflicha fikr-mulohazalar bildirildi.