Parij "Katta Dubulg'a". To'raev uchinchi bosqichda, Diyora, Diyorbek, Sardor va G'iyosjonda mag'lubiyat

Xabar berganimizdek, Paris Grand Slam 2020 musobaqasining ilk kuni 6 nafar dzyudochimiz turnir medallari hamda Tokio-2020 Olimpiadasi yo'lidagi qimmatli reyting ochkolari uchun tatamiga chiqishi kerak edi.

Ulardan uch nafari raqiblariga imkoniyatni boy berib, musobaqadagi ishtiroklarini yakunlashdi. -52 kg vazn toifasidagi vakilamiz Diyora Keldiyorova ilk davrada madagaskarlik Tessia Ciorinrinani mag'lub etdi. Ammo, ikkinchi bosqichda italiyalik taniqli raqibi Odette Gyuffridaga yutqazib qo'ydi. Keldiyorova Parijdagi ishtiroki uchun 120 reyting ochkosiga ega bo'ldi.  

-66 kg vaznli dzyudochimiz Sardor Nurillaev ikkinchi bosqich uchrashuvida ispaniyalik Martin Gayteroga qo'shimcha bo'limda imkoniyatni boy berdi. Ushbu vaznda debyut qilgan Diyorbek O'razboev ham mag'lubiyat alamini totib ko'rdi. Rio-2016 Olimpiadasi bronza medali sovrindori rosiyalik Murad CHopanovdan engildi. 

-73 kg vaznda yurtimiz sharafini himoya qilayotgan Hikmatulloh To'raev o'zining ilk bellashuvida botsvanalik Tirelo Lekokodan ustun keldi. Bu vazndagi ikkinchi vakilimiz G'iyosjon Boboev esa mo'g'ulistonlik Odbayar Ganbaatardan mag'lub bo'ldi. 

Birozdan so'ng Kemran Nurillaev (-60 kg) ikkinchi bosqich uchrashuvida 18-Osiyo o'yinlari sovrindori, koreyalik Li Xarimga qarshi tatamiga chiqadi.