Parijda O'zbekiston va Franciya Paralimpiya qo'mitalari rahbarlari uchrashuv o'tkazdi

Tashrifning ikkinchi kunida Osiyo Paralimpiya qo'mitasi vice-prezidenti – O'zbekiston Milliy paralimpiya qo'mitasi raisi Muxtorxon Tashxodjaev hamda mamlakatimizning Franciya Respublikasidagi Favqulodda va muxtor elchisi Sardor Rustamboev Franciya Sport, ekspertiza va qobiliyatlarni aniqlash milliy instituti (INSEP) bosh direktori Fabien Kanu hamda Franciya Paralimpiya qo'mitasi prezidenti Marie-Ameli Le Fur bilan uchrashdi. 

Samimiy ruhda kechgan muzokaralar davomida Fabien Kanu O'zbekistonda sportni qo'llab-quvvatlash borasida olib borayotgan islohotlarni yuqori baholab, o'zbek sportchilarining nufuzli halqaro musobaqalarda muvaffaqiyatli ishtiroki, davlat rahbari tomonidan olib borilayotgan tizimli ishlarning natijasi ekanini alohida takidladi. Marie-Ameli Le Fur esa o'zbekistonlik hamkasblari bilan o'zaro tajriba almashishga va hamkorlikda sport tayyorgarlik dasturlarini tashkil etishga qiziqish bildirdi.

Bundan tashqari, tomonlar Parij-2024 yozgi Paralimpiya o'yinlariga sportchilarni tayyorlash bo'yicha o'zaro tajriba almashish imkoniyatlarini muhokama qildi. 

SHuningdek, Muxtorxon Tashxodjaev yuqori darajali sportchilarni tayyorlaydigan institutning (INSEP) sport infratuzilmasi bilan ham yaqindan tanishdi. Francuz tomoni esa o'zbekistonlik Paralimpiya sportchilarini Parij-2024 Paralimpiya o'yinlariga yanada puxta tayyorgarlik ko'rishda o'quv-mashg'ulot yig'inlari o'tkazish uchun ushbu sport bazalarini taqdim etish imkoniyatini ko'rib chiqishga tayyorligini bildirdi. 

Uchrashuv so'ngida tomonlar o'zaro aloqalarni yanada mustahkamlash maqsadida hamkorlik memorandumini imzolashga kelishib olishdi.