Pettis Fergyusonga qarshi revansh jangi o'tkazmoqchi

U kecha UFC Vegas 17 turniri doirasidagi jangini yarim o'rta vazn toifasida o'tkazib, ochkolar hisobiga ko'ra Aleks Morononi mag'lubiyatga uchratgandi. Pettis jangdan so'ng o'tkazilgan matbuot anjumanida engil vaznga qaytishi va ilk jangidayoq Toni Fergyusonga qarshi revanshda oktagonga chiqmoqchi ekanini aytdi. 

"O'ylashimcha, Fergyuson bilan revansh jangimiz ko'pchilikka ham qiziq bo'ladi. U ketma-ket ikkita jangda kuchli raqiblarga mag'lub bo'ldi. Menga Tonini tamom bo'ldi deguvchilar yoqmayapti. U xavfli raqib. Ilk jangimizda Fergyuson tirsak zarbasi bilan meni "ushlab" olgandi. Endi hammasi boshqacha bo'ladi. Men to'liq mashg'ulot lagerini o'tayman. Avvalgi jangdagi kabi hammasi tez amalga oshib ketmaydi", — dedi Pettis.

Eslatib o'tamiz, Fergyuson va Pettis o'rtasidagi ilk jang UFC 229 turniri doirasida o'tkazilib, unda Toni g'alaba qozongandi.