Poland Open. To'rt "klassigimiz" shohsupada, Bahromov chempion! (FOTOGALEREYA)

Poland Open reyting turnirida O'zbekiston terma jamoasi ham muvaffaqiyatli ishtirok etdi. Biroz avval yakunlangan yunon-rum kurashchilar musobaqasida to'rt nafar polvonimiz g'olib va sovrindorlar safidan joy oldi. 

60 kg vazn toifasida yurtimiz sharafini himoya qilgan Islom Bahromov finalda yaponiyalik Ayata Suzukini 5-3 hisobida mag'lub etib, Poland Open turniri chempioniga aylandi. U finalga qadar Mayrbek Salimov (Polsha), Kristian Kechkemeti (Vengriya)ni mos ravishda 6-0 va 7-0 hisobida mag'lubiyatga uchratgan edi. 

72 kg vaznda gilamga chiqqan yurtdoshimiz Mirzobek Rahmatov finalga qadar mag'lubiyatsiz etib borib, kumush medalni qo'lga kiritdi. Rahmatov mezbonlar vakili Gevorg Saxakyanga bir ochko farqi bilan yutqazib qo'ydi. 

Terma jamoamizga yana ikkita bronza medalini Muhammadqodir Yusupov (60 kg) va Rustam Assakalov Rustam (87 kg) taqdim etdi. Har ikkala yunon-rum kurashchimiz ham bronza medali uchun kechgan bellashuvlarda polshalik atletlardan ustun kelishdi. 

SHu tariqa, Ravshan Ro'ziqulov boshchiligidagi O'zbekiston yunon-rum kurashi terma jamoasi Poland Open turnirini 2 ta oltin, 1 ta kumush, 4 ta bronza medali bilan yakunlandi. Kecha yunon-rum kurashchilarimizdan Jalgasbay Berdimuratov oltin, Elmurat Tasmuradov va Mo'minjon Abdullaev bronza medaliga sazovor bo'lishgandi. 

Varshavadagi xalqaro turnirni boshlab bergan erkin kurashchilarimiz esa bittadan oltin, kumush va bronza medalini qo'lga kiritishgan edi. Tokio Olimpiadasi licenzianti G'ulomjon Abdullaev chempionlik shohsupasiga ko'tarilgan bo'lsa, Rashid Qurbonov kumush, Mahmud SHavkatov bronza medaliga ega chiqqandi.