Poytaxtimizda xorijlik sport shifokorlari ishtirokida xalqaro anjuman o'tkazilmoqda

Respublika xirurgiya ilmiy-amaliy markazi, O'zbekiston Milliy olimpiya qo'mitasi va Respublika sport tibbiyoti ilmiy-amaliy markazi bilan hamkorlikda “Anesteziologiya-reanimatologiya va intensiv davolashda yangi texnologiyalar“ nomli Xalqaro ilmiy anjuman o'tkazildi. Unda Sog'liqni saqlash vaziri Alisher SHodmonov, yurtimizda sport sohasining etakchi mutaxassislari va xalqaro ekspertlar ishtirok etishdi. Anjumanda, shuningdek, MOQ prezidenti Rustam SHoabdurahmonov ham qatnashdi va nutq so'zladi. 

“Ayni paytda Tokio Olimpiadasiga davlatimiz qo'llab-quvvatlashi asosida katta hajmdagi tayyorgarlik ishlari amalga oshirilmoqda. Jumladan, birinchi marta barcha federaciyalarda sport shifokori, psixolog, dietolog, massajchi shtat-birliklari ochildi va to'liq moliyalashtirildi. Bu borada har bir federaciyada tajribali mutaxassislar ish boshlashdi. Ishonamanki, bu kabi tadbirlarning o'tkazilishi yurtimizda sport tibbiyoti rivojiga ulkan xissa qo'shadi”, – dedi Rustam SHoabdurahmonov.

Anjuman doirasida “Sport tibbiyoti“ amaliyotida shoshilinch holatlar rukni tashkil etilib, ushbu yo'nalish bo'yicha qator xorijiy mamlakatlar, jumladan, Amerika Qo'shma SHtatlari, Italiya, Germaniya, Rossiya Federaciyasi va Qozog'istondan kelgan etakchi olimlar ishtirokida Satelit simpozium o'tkazildi.

Ushbu anjumanda sport faoliyatida uchraydigan shoshilinch holatlarda sportchilarga tibbiy yordam ko'rsatishning o'ziga xos xususiyatlari mavzusida fikr almashilindi. Tadbir davomida O'zbekiston sport federaciyalarida faoliyat olib borayotgan ko'p sonli shifokorlar, ilmiy-amaliy markaz vakillari, sport tibbiyoti bo'yicha mutaxassislar ham ishtirok etishdi. 

Maruzalarda xorijiy mutaxassislar tomonidan berilgan malumotlar atletlarimizni nufuzli xalqaro musobaqalar, jumladan, Tokio shahrida bo'lib o'tadigan yozgi Olimpiya o'yinlariga tibbiy-psixologik hamda jismoniy jihatdan tayyorlash masalasida o'ziga xos tajriba maktabi bo'ldi.