Qatarda Milliy olimpiya qo'mitalari Associaciyasining Bosh Assambleyasi o'tkazildi

Mazkur tadbirda Xalqaro Olimpiya qo'mitasiga azo 204 mamlakat vakillari qatorida O'zbekiston Milliy olimpiya qo'mitasi prezidenti Rustam SHoabdurahmonov, shuningdek, MOQ prezidenti maslahatchisi SHerzod Asatullaev ham qatnashdi. 

Assambleyaning birinchi kunida MOQA rahbariyati va qitalar kesimida tashkilotning ortda qolgan vaqt oralig'ida qilgan ishlari yuzasidan hisobotlari tinglandi. Kecha 2022 yil Pekinda bo'lib o'tadigan qishki Olimpiya o'yinlari va Senegaldagi o'smirlar Olimpiadasi, 2024 yili Parijda o'tadigan XXXIII yozgi Olimpiya o'yinlari, 2026 yil Milan/Kortina shaharlari mezbonlik qiladigan qishki Olimpiya o'yinlariga ko'rilayotgan tayyorgarliklar yuzasidan hisobotlar tinglandi.

Ushbu uchrashuv davomida O'zbekiston Milliy olimpiya qo'mitasi rahbari Rustam SHoabdurahmonov Xalqaro Olimpiya qo'mitasi prezidenti Tomas Bax bilan uchrashib, yurtimizda sportni rivojlantirish va sohada olib borilayotgan keng ko'lamli ishlar yuzasidan suhbat olib borishdi.

O'z navbatida Tomas Bax Xalqaro Olimpiya qo'mitasining 125 yillik faoliyati davomida butun dunyoda Olimpiya harakatini rivojlantirish yo'lida olib borilgan ishlar yuzasidan qilgan nutqi yig'ilganlarning diqqat-etiborida bo'ldi. 

Rustam SHoabdurahmonov va SHerzod Asatullaev ushbu tadbir davomida bir qator Milliy olimpiya qo'mitalari rahbariyati bilan uchrashuv o'tkazishdi. Xususan, Rossiya, Yaponiya, Kuba, Koreya Respublikasi Milliy olimpiya qo'mitalarining rahbarlari bilan olib borilgan uchrashuvlar mamlakatlararo sport sohasidagi hamkorlik rishtalarini, Olimpiya birdamligini yanada mustahkamlashda muhim ahamiyat kasb etadi.