Qo'shaloq bayramlar muborak, Armen Bagdasarov!

Armen Bagdasarov 1972 yilning 31 iyul kuni Toshkent shahrida dunyoga kelgan. O'zbekiston Respublikasida xizmat ko'rsatgan murabbiy Vladimir Pyataev qo'l ostida dzyudo sir-asrorlarini o'rgangan.

Armen Bagdasarov 1996 yili Atlantada o'tgan Yozgi olimpiya o'yinlarida mustaqil O'zbekiston terma jamoasiga ilk medalni taqdim etgan. AQSH tatamilarida -86 kg vazn toifasida yurtimiz sharafini himoya qilgan dzyudochimiz kumush medalni qo'lga kiritgan edi. 

Bagdasarov 1993-2001 yillarda O'zbekiston terma jamoasi azosi sifatida xalqaro musobaqalarda ishtirok etgan. 1996 yilda u Olimpiadadagi muvaffaqiyatli ishtirokdan tashqari Osiyo chempionligiga ham erishgan. 1998 yili Osiyo o'yinlari kumush medali sovrindori, 1999 yilda esa ikki karra Osiyo chempioniga aylandi. SHuningdek, u Osiyo chempionatining ikki karra bronza medali hamda Butunjahon talabalar Universiadasining kumush medali sohibi hisoblanadi.     

2001 yilda sportchilik faoliyatini yakunlagan Bagdasarov avvaliga terma jamoa bosh murabbiyi, keyin esa O'zbekiston dzyudo federaciyasi prezidenti lavozimida ishlagan. SHu bilan bir qatorda Respublika sport yakkakurashlari oliy sport mahorati maktabi direktori bo'lgan. Bugungi kunda Xalqaro dzyudo federaciyasi (IJF)da sport direktori lavozimida faoliyat yurityapti.  

Armen Bagdasarovning sportdagi ko'p yillik muvaffaqiyatli ishtiroki hukumatimiz tomonidan munosib taqdirlangan. U "Mehnat shuhrati" ordeni (1996), O'zbekiston Respublikasida xizmat ko'rsatgan sportchi (2000), O'zbekiston Respublikasida xizmat ko'rsatgan murabbiy (2006) unvonlariga loyiq ko'rilgan. Xalqaro dzyudo federaciyasi (IJF) Armen Bagdasarovni dzyudo sport turining dunyodagi rivojiga qo'shgan xissasi uchun oltin medal (World Judo Tour gold card) bilan mukofotlagan. 

Furatdan foydalanib, Armen Bogdasarovni bugungi tavallud ayyomi bilan muborakbod etadi. U kishiga sog'lik-salomatlik va oilaviy baxt tilaymiz.