Qozog'iston Milliy olimpiya qo'mitasi vakillari Toshkentda mehmon bo'lishdi

Mehmonlarni O'zbekiston MOQ birinchi vice-prezidenti Oybek Kasimov hamda bosh kotib Jasur Matchanovlar kutib olishdi. Tashrifdan ko'zlangan asosiy maqsad Milliy olimpiya qo'mitasi huzurida faoliyat yuritayotgan Respublika sport tibbiyoti ilmiy-amaliy markazi faoliyati bilan yaqindan tanishish, kerak bo'lsa undan andoza olish va Qozog'istonda ham ana shunday markaz tashkil etishni muhokama qilishdan iborat edi. Tibbiyot markazini ko'zdan kechirar ekan, Qozog'iston MOQ bosh kotibi hayajonini yashira olmadi. 

"O'zbekiston MOQ qoshida faoliyat yuritayotgan Respublika sport tibbiyoti ilmiy-amaliy markazi menda juda katta taassurot qoldirdi. Bunday sport tibbiyot majmuasi Markaziy Osiyoda yagona ekanligi ahamiyatlidir. Biz ham Qozog'istonda sport tibbiyoti bo'yicha ana shunday markaz tashkil qilishni istaymiz va bu borada O'zbekiston MOQ bilan yaqin hamkorlik o'rnatish istagidamiz", - dedi Daniyar Abulgazin.

SHuningdek, uchrashuv davomida qishki Olimpiya o'yinlariga ko'rilgan tayyorgarlik bo'yicha fikr almashildi. O'z navbatida, Qozog'iston MOQ bosh kotibi qishki sport turlari bo'yicha terma jamoalarimizning o'quv-mashg'ulot yig'inlarini Qozog'istonning tog'li xududlarida hamkorlikda tashkil qilish taklifi bilan chiqdi.