Ramazon Temirov oktagonga chiqadigan UFC turnirining asosiy jangi malum

Vaziyatga yaqin ishonchli manbalarning xabar berishicha, UFC Fight Night turnirining asosiy jangi yarim og'ir vazn toifasida sobiq UFC chempioni rossiyalik Magomed Ankalaev ishtirokida o'tkaziladi. Unga shu kuni chempionlik kamari uchun sobiq davogar amerikalik Xalil Rauntri raqiblik qiladi.

O'tgan yilning mart oyida Magomed Ankalaev hakamlarning yakdil qarori bilan Aleks Pereyrani mag'lub etib, divizionning yangi chempioniga aylangandi. Ammo oktyabr oyida o'tgan revansh jangida rossiyalik birinchi raunddayoq braziliyalik raqibiga texnik nokaut bilan yutqazib, chempionlikni boy berdi.

Xalil Rauntri esa 2024 yil oktyabr oyida Pereyradan chempionlik kamarini tortib olishga urinib ko'rgan, lekin muvaffaqiyatsizlikka uchragandi. O'shanda u to'rtinchi raundda Poatanga texnik nokaut bilan yutqazib qo'ygandi. SHundan so'ng u yana ikkita jang o'tkazib, Jamal Xill ustidan hakamlarning yakdil qarori bilan g'alaba qozondi, Irji Proxazkaga esa uchinchi raundda nokaut bilan yutqazdi.

Ayni paytda Magomed Ankalaev va Xalil Rauntri tashkilotning yarim og'ir vazn toifasi reytingida mos ravishda birinchi va beshinchi o'rinlarni egallab turibdi.

Xabaringiz bor, Abu-Dabi turnirida hamyurtimiz Ramazon Temirov UFC reytingida o'ninchi o'rinni egallab turgan avstraliyalik Stiv Ercegga qarshi jang o'tkazadi.