Retro. Artur Taymazovning Pekin-2008dagi triumfidan FOTOREPORTAJ

8-24 avgust kunlari oralig'ida o'tkazilgan to'rt yillikning eng nufuzli musobaqasida sayyoramizning 204 davlatidan jami 11 099 atlet ishtirok etgan. Olimpiya o'yinlari 28 sport turi bo'yicha o'tkazilib, sportchilar 302 ta medallar jamlanmasi uchun kurash olib borishgan. 

Mustaqil O'zbekiston sport delegaciyasi o'z tarixida to'rtinchi bor sayyoramizning eng nufuzli musobaqasida ishtirok etdi. Ellik olti nafar atletimiz 14 ta sport turi bo'yicha medallar jamlanmasi uchun bahslarga kirishgan. Yakunda 1 ta oltin, 2 ta kumush, 3 ta bronza medali bilan umumjamoa hisobida 40-o'rinni band etganmiz. 

Erkin kurashchimiz Artur Taymazov ikkinchi bor Olimpiada chempioniga aylangan bo'lsa, yana bir erkin kurashchimiz Soslan Tigiev (-74 kg) kumush medalga sazovor bo'lgan. Sport gimnastikachimiz Anton Fokin, dzyudochimiz Rishod Sobirov hamda batutda sakrash bahslarida ishtirok etgan Ekaterina Xilko bronza medalini qo'lga kiritgan edi. 

To'g'ri, keyinchalik Artur Taymazovning qon tarkibida taqiqlangan modda borligi sabab uning natijasi hamda Pekin-2008dagi yagona oltin medalimiz bekor qilingandi. Ammo, biz hamon o'sha yorqin damlarni eslashda davom etamiz. 

Suratlar muallifi - Anvar Ilyasov