Rossiya chempionati muxlislarsiz o'tkaziladi

Xabar berganimizdek, erkin kurashchilar o'rtasidagi mamlakat chempionati 9-11 oktyabr kunlari Vladikavkaz shahrida bo'lib o'tadi. SHimoliy Osetiya sanitariya xizmati rasmiylari chempionat bellashuvlariga muxlislarni kiritishga qarshi ekanliklarini malum qilishdi. Bu haqida televideniyadagi chiqishida SHimoliy Osetiya-Alaniya sport vaziri, yunon-rim kurashi bo'yicha Olimpiada chempioni Alan Xugaev xabar berdi.

"Biz bu masalani tegishli tashkilotlar bilan muhokama qildik. CHempionat bahslarini muxlislarsiz o'tkazishni maslahat berishdi. Mamlakatimiz, shu jumladan Vladikavkazdagi epidemiologik vaziyat sportchilarning sog'lig'i bilan tavakkat qilmaslikka chorlamoqda", - dedi Xugaev.  

Eslatib o'tamiz, koronavirus pandemiyasi sabab Rossiya chempionatining manzili va muddati uch bor o'zgartirildi. Avvaliga Ulan-Ude, keyin Moskva, endi esa Vladikavkaz mezbon sifatida tanlandi. Bellashuvlar 10 ta vazn toifasida o'tkaziladi.