Rossiya sportchilar ittifoqi MOQning hamkorlaridan biriga aylandi

Mehmonlarni O'zbekiston MOQ Bosh kotibi Oybek Kasimov qarshi oldi. SHundan so'ng O'zbekiston va Rossiya sportidagi do'stona aloqalarni yangi bosqichga olib chiqish mavzusida uchrashuv o'tkazildi.

Unda, shuningdek, O'zbekiston Respublikasi Yoshlar siyosati va sport vazirining maslahatchisi Avaz Karimov, Bahodir Maxsitov boshchiligidagi yurtimiz sporti faxriylari ham ishtirok etishdi. Suhbat avvalida Oybek Omilovich bunday faxriy mehmonlarni kutib olish va o'zaro do'stona aloqalarni yanada rivojlantirishdan mamnun ekanini bildirdi. 

MOQ Bosh kotibi mamlakatimizda Prezidentimiz tomonidan Olimpizm harakatini rivojlantirish bo'yicha olib borilayotgan islohotlar haqida ham malumot berdi. SHuningdek, poytaxtimizda o'tayotgan boks bo'yicha jahon chempionatida rossiyalik sportchilarning qayd etayotgan natijalarini yuqori baholadi.

O'z navbatida, mehmonlar ham ko'p yillik hamkorlikni davom ettirish rivojlanish sari qo'yiladigan yangi qadam bo'lishini takidlashdi. Xususan, bir qator loyihalarni amalga oshirish, ko'plab sport turlarida terma jamoalar o'rtasida qo'shma o'quv-mashg'ulot yig'inlarini o'tkazish, zamonaviy sportning ilm-fan yutuqlari bo'yicha tajriba almashish bo'yicha fikr yuritishdi.

Tadbir yakunida O'zbekiston sport faxriylari kengashi hamda “Rossiya sportchilar ittifoqi” o'rtasida hamkorlik memorandumi imzolandi. Undan kelgusida har ikki mamlakat sport faxriylari ishtirokida tadbirlar tashkil etish, sport yutuqlarida ularning boy tajribasidan foydalanish kabi masalalar o'rin olgan.