Safina Sadullaeva bugun "Brilliant liga"dagi ishtirokini boshlaydi

Nufuzli turnirning bugungi kuni doirasida o'zbekistonlik Safina Sadullaeva ham chiqish qiladi.

Balandlikka sakrash dasturida hamyurtimizdan tashqari amaldagi jahon rekordchisi va Parij-2024 yozgi Olimpiya o'yinlari chempioni, ukrainalik Yaroslava Maguchix, shuningdek, Olimpiya o'yinlarining 2 karra kumush medali sohibasi Nikola Olislagerc (Avstraliya), jahon chempionati sovrindorlari Irina Gerashenko (Ukraina), Eleanor Petterson (Avstraliya) kabi nomdor sportchilar ham medallar uchun kurash olib borishadi.

Musobaqa doirasida balandlikka sakrash dasturi Toshkent vaqti bilan soat 21:30 da start oladi.

Eslatib o'tamiz, Safina 22 avgust kuni "Brilliant liga"ning Lozanna bosqichida ishtirok etib, 8 ochko qo'lga kiritgan edi. Uning kvalifikaciyadagi jami ochkolari hozirda 9 tani tashkil etmoqda.

Malumot uchun, "Brilliant liga"ning final bosqichi 13-14 sentyabr kunlari Belgiyaning Bryussel shahrida bo'lib o'tadi.