Samarqandda sport faxriylari yodga olindi va ezozlandi

“Ajdodlarni xotirlash – muqaddas qadriyat”, “Etibor va g'amxo'rlik – insoniy burch” shiorlari ostida tashkil etilgan tadbirda 300 nafardan ortiq jahon va Osiyo chempionatlari hamda xalqaro sport musobaqalarida g'olib va sovrindor bo'lgan sportchilar va ularning ustoz murabbiylari ishtirok etdi.

Tadbirda so'z olganlar tomonidan viloyatimiz sportini dunyoga tanitgan sport faxriylarining hayoti faoliyati yodga olindi va hozirda yosh avlodga sport sirlarini o'rgatib kelayotgan faxriy murabbiylar ezozlandi.

– Ustozlik sharafini o'zim hozirda ustoz bo'lganimda his etmoqdaman, – deydi Osiyo o'yinlari chempioni Mo'minjon Abdullaevning ustozi SHarof Mamatqulov. – Bugungi tadbirda ham sport sohasida doim maslahat beradigan va qo'llab-quvvatlab kelayotgan faxriy ustozlarim Yo'ldosh Iskanov va Rabbim Tashanovlar bilan o'rtoqlashdik va sport tadbirlaridagi qiziqarli voqealarni esladik.

Ushbu o'tkazilgan tadbirda 2019 yilning may oyi butun respublikada “Sport oyligi” deb elon qilinganligi viloyatda bir qator sport musobaqalari, ommaviy yugurish marafonlari va taniqli sportchilar ishtirokida “Master klass”lar tashkil etilishi rejalashtirilganligi aytib o'tildi.

Tadbirda viloyat hokimining o'rinbosari R.Qobilov va jamoat tashkilotlari rahbarlari ishtirok etdi.