Sanjar Tursunov: Men Olimpiadaga yo'llanma oldim... gap-so'zlarga esa ahamiyat bermayman!

Kecha kechki dasturdan o'rin olgan -91 kg vazn toifasidagi chorak final janglari bo'lib o'tdi. A ringda Amirshoh Samadov Tokio Olimpiadasi yo'llanmasi sohibi Sanjar Tursunovga qarshi ringga chiqdi. Qiyin kechgan jang so'ngida Tursunovning qo'li baland ko'tarildi. G'alabadan keyin Sanjar Tursunovdan kichik intervyu olishga muvaffaq bo'ldik.

- Yuzaga kelgan pandemik vaziyat tufayli barcha kabi siz ham ancha muddat jang o'tkazmadingiz...

- Karantin bo'lsa-da, mashg'ulotlar to'xtab qolgani yo'q. Lekin mashg'ulot boshqa, musobaqa boshqa. Siz aytgandek, 7-8 oydan buyon katta ringda jang qilmadim. Musobaqalarda ishtirok etmay tayyorgarlik ko'rib yuraversak, darajamiz ham pasayib boraveradi.

- Belgilangan og'irlikni bajarish uchun necha kilogramm vazn tashladingiz?

- Avvaliga 106 kg edim. Keyin 14-15 kun oralig'ida -91 kiloga tushdim.

- O'tgan yili yarim finalda Jamshidjon Abdullaevga imkoniyatni boy berib qo'ygan edingiz...

- To'g'ri, o'shanda jahon birinchiligidan kelgandim. Yana 10-15 kundan so'ng jang qilishim kerak edi. Ochig'ini aytaman, mamlakat chempionatiga tayyorgarlik ko'rmadim, vaqt ham bo'lmadi. Mashg'ulot ham o'tkazmadim, faqat uxladim. SHuning uchun musobaqani erta tark etganman. Bu safar Xudo xohlasa, hammasi yaxshi bo'ladi.

- Boks muxlislari sizni vazningizda birinchi raqamli bokschi nomiga munosib emas deb juda ko'p tanqid qilishadi. Bunga qanday munosabatdasiz?

- Odamlar hamma narsani gapiraverdi. Men xalqaro turnirlarda natija qilayapman. Men Olimpiadaga licenziya oldim, bo'ldi tamom. To'g'risini aytsam, gap-so'zlarga ahamiyat bermayman. 

- Agar Olimpiya o'yinlarida natija qilolmasangiz, terma jamoaga qaytmaydigan bo'lib professional boksga o'tib ketasizmi?

- To'liq prof boksga o'taman, albatta. Lekin Xudo xohlasa Olimpiadada medal olaman.

Sarvinoz Rahmonqulova suhbatlashdi