Sharjah Masters 2025 yakunlandi. Abdusattorov shohsupada! Qolgan shaxmatchilarimiz nechanchi o'rinlarni egallashdi?

Mukofot jamg'armasi 73 000 AQSH dollarini tashkil etgan ushbu musobaqaning kuchlilar jam bo'lgan "Masters" guruhida to'rt nafar grossmeysterimiz - Nodirbek Abdusattorov, Jahongir Vohidov, Muhiddin Madaminov va Ortiq Nig'matov ham sovrinli o'rinlar uchun bahs olib borishdi. 

Kecha musobaqada so'nggi 9-tur uchrashuvlari bo'lib o'tdi. Musobaqada birinchi raqam ostida saralangan Nodirbek Abdusattorov birinchi doskada qora donalarda turnirning beshinchi raqamli ishtirokchisi, eronlik grossmeyster Amin Tabatabayi bilan durangga imzo chekdi. Nodirbekning ochko yo'qotishidan unumli foydalangan ikkinchi raqamli shaxmatchi, niderlandiyalik Anish Giri oq donalarda hindistonlik Aditya Mittalni mag'lubiyatga uchratdi va 7 ochko bilan Sharjah Masters 2025 chempioniga aylandi. 

Nodirbek Abdusattorov 6,5 ochko bilan qo'shimcha ko'rsatkichlarga ko'ra uchinchi o'rinni egalladi. So'nggi turda qora donalarda o'ynashiga qaramay, eronlik Daneshvar Bardiyani mag'lub etgan serbiyalik Aleksandr Indjich 6,5 ochko bilan ikkinchi o'rinni band etdi. 

Sharjah Masters 2025 turnirining 9-turida Jahongir Vohidov oq donalarda polshalik Malek Jandan ustun keldi. Muhiddin Madaminov qora donalarda turkiyalik Ishik Alparslan bilan durang o'ynadi. Ortiq Nig'matov esa oq donalarda yana bir turk shaxmatchisi Sanal Vahab bilan murosaga keldi. 

SHu tariqa, Nodirbek Abdusattorov 6,5 ochko bilan 3, Ortiq Nig'matov 4,5 ochko bilan 34, Muhiddin Madaminov 4 ochko bilan 60, Jahongir Vohidov esa 3,5 ochko bilan 66-pog'onadan joy oldi.