Sobiq UFC chempioni qolgan umrini qamoqda o'tkazishi mumkin

Uch kun oldin farzandiga nopok munosabatda bo'lgan shaxsga nisbatan zo'ravonlik qilishga uringan amerikalik jangchiga 10 ta ayblov qo'yildi. Xususan, qotillikka urinish, agar u aybdor deb topilsa, kamida 20 yildan to umrining oxirigacha panjara ortida qolishi mumkin.

Policiya hisobotiga ko'ra, Velaskes ayblanuvchi Garri Yujin Gularteni quvib, uning mashinasiga zarba bergan, keyin esa unga 40-kalibrli to'pponchasidan o'q uzgan. O'q Gulartening 63 yoshli o'gay otasi Pol Benderning tana va qo'l qismini yaralagan. SHuni takidlab o'tish kerakki, Garri Yujin Gularte mashinada bo'lgan uchinchi shaxs — yani onasi kabi jarohatlanmagan.

"Fojia shundaki, janob Velaskes adolatni o'z qo'liga olishga qaror qilib, jamoatchilik va mashinadagilarni xavf ostiga qo'ydi. Bu zo'ravonlik uning oilasiga yanada ko'proq azob-uqubatlarni keltirib chiqaradi", - dedi Santa Klara okrugi prokurori Jeff Rozen.

Eslatib o'tamiz, o'tgan juma kuni onasi bilan xususiy bolalar bog'chasiga egalik qiluvchi Garri Yujin Gularte "14 yoshgacha bo'lgan bolalarga nisbatan odobsiz va nopok xatti-harakatlar"da ayblangan, ammo prokurorning etirozlariga qaramay, u garov pulini to'lab ozod qilindi. SHundan so'ng Velaskes jinoyatchini o'zi jazolashga qaror qildi.