Sochida musobaqa boshlandi. Unda o'zbek bokschilari ham ishtirok etishadi

Ushbu musobaqada to'rtta jamoa ishtirok etmoqda. 

Ular - Murat Gassiev, Dmitriy Bivol, Sultan Ibragimov va Eduard Troyanovskiy jamoalaridir. 

Etiborlisi, Murat Gassiev jamoasi tarkibida ikki nafar o'zbekistonlik bokschi - SHukurjon Rahimov (-59 kg) va Odiljon Aslonov (-75 kg) ishtirok etadi. Yigitlarimiz Sochiga murabbiy Ravshan Xodjaev boshchiligida jo'nab ketishgan. 

Bellashuvlar 4 raunddan iborat bo'ladi. Turnirning sovrin jamg'armasi 10 million rublni tashkil etadi. Janglar "Match Boec" telekanali orqali namoyish etiladi. 

"O'zbekistonlik bokschilar 5 yanvar kuni ringga ko'tarilishlari kutilmoqda. O'sha kuni soat 21:30 dan so'ng janglar boshlanadi. Dastlabki juftlikda SHukurjon Rahimov jang qiladi. 

Musobaqada Rossiyaning professional bokschilari qatnashadi. Bahslarni 15 nafar hakam baholaydi. Uch nafar hakam ring va uning oldida ishlasa, 12 nafar hakam onlayn ravishda janglarni baholaydi. Yigitlarimiz Murat Gassiev jamoasida jang qilishadi. 

Ushbu janglar BoxRec tizimiga kiritilmaydi (Bokschilarning professional janglari qatoriga qo'shilmaydi - Olamsport)", - dedi murabbiy Ravshan Xodjaev saytimiz muxbiri bilan suhbatda.