Sport kurashlari bo'yicha MOQ sovrini uchun o'smirlar o'rtasida O'zbekiston chempionati start oldi

Bugun O'zbekiston taekvondo associaciyasiga qarashli "Universal" sport majmuasida musobaqaning tantanali ochilish marosimi bo'lib o'tdi.

Unda Milliy olimpiya qo'mitasi Bosh kotibi Jasur Matchanov so'zga chiqib, turnirda qatnashadigan sportchilarga omad tiladi.

"Bugun O'zbekiston sport kurashlari associaciyasi Milliy olimpiya qo'mitasi sovrini uchun o'smirlar o'rtasida O'zbekiston chempionati musobaqasini boshlamoqda. Bundan buyog'iga sportning ko'plab turlarida Milliy olimpiya qo'mitasi sovrini uchun nufuzli turnirlar tashkil etiladi. Biz bejizga ana shunday musobaqaning birinchisiga sport kurashlarini tanlab olmadik. Erkin va yunon-rum kurashlarining o'zbek sportida tutgan o'rni va nufuzi ancha baland. Milliy olimpiya qo'mitasi sovrini uchun boshlangan musobaqada esa yosh polvonlarimizga omad va zafarlar tilayman. Musobaqalar halol va jangovor ruhda o'tishidan umidvorman!", - dedi Jasur Matchanov.

Besh kun davom etadigan turnirda Respublikamizning turli xududlaridan tashrif buyurgan 700 nafardan ortiq sportchi sovrinli o'rinlar uchun kurash olib boradi.

Malumot uchun, ushbu musobaqa may oyida poytaxtimizda o'tkaziladigan Osiyo chempionatiga tayyorgarlik vazifasini bajaradi.