Sport kurashlari. Yunon-rum kurashchilarimiz bronza medali va licenziya uchun imkoniyatlarini saqlab qoldi

Bugun umumiy hisobda 5 nafar sportchimiz gilamga chiqdi.

Dastlab, ayollar kurashi doirasida -62 kg vaznda Ariuxan Jumabaeva ilk o'tish bahsida bolgariyalik Bilyana Dudova bilan jang qilib, 0:11 hisobida imkoniyatni boy berdi.

Yunon-rum kurashchilarimizdan Jasurbek Ortiqboev (55 kg) yarim finalga qadar etib bordi. U final yo'lida gruziyalik Nugzari Sursumiyaga mag'lub bo'ldi - 4:7. Ortiqboev ertaga bronza medali uchun gilamga chiqadi.

77 kg vazn toifasidagi vakilimiz Aram Vardanyan esa chorak finalga qadar etib bordi. Qirg'izistonlik Akjol Mahmudovga qarshi kechgan chorak final bahsida 0:6 hisobida imkoniyatni boy berib qo'ydi. Aram ham ertaga bronza medali va Parij-2024 yozgi Olimpiada licenziyasi uchun gilamga chiqish huquqini saqlab qoldi.

Muhammadqodir Rasulov (82 kg) esa ilk bosqichda Finlandiya vakili Artyom SHapovalovdan 8:0 hisobida ustun keldi. Nimchorak finalda esa sportchimiz turkiyalik Burxan Akbudakga mag'lub bo'ldi va musobaqani yakunladi.

Eng og'ir vazndagi sportchimiz Temurbek Nasimov (130 kg) esa ilk bosqichdayoq koreyalik Li Syong CHanga mag'lub bo'lib, jahon chempionatini tark etdi.

SHunday qilib, bugun gilamga chiqgan ikki nafar sportchimiz bronza medali va Olimpiada licenziyasi uchun kurashish huquqini saqlab qoldi.