Sport kurashlaridagi tatil 1 sentyabrgacha uzaytirildi

Bu haqida UWW Ijroiya qo'mitasining navbatdagi yig'ilishida xabar berildi. Butunjahon kurash dunyosi tez orada, aniqrog'i avgust oyida 2020 yilning qolgan qismi hamda 2021 yilgi mavsum uchun taqvimni elon qiladi. 

Onlayn yig'ilishda UWW vice-prezidenti, O'zbekiston Sport kurashlari Associaciyasi rais o'rinbosari Axroljon Ro'ziev ham ishtirok etdi.

Konferenciyada dunyodagi epidemiologik vaziyat hamon tahlikali bo'lib turgani, bu esa musobaqalarning kutilganidan ham kechroq muddatda boshlanishiga sabab bo'lishi haqida so'z bordi. Onlayn konferenciya tarzida o'tkazilgan yig'ilishda 1 sentyabrgacha hech qanday musobaqa o'tkazilmasligiga kelishib olindi. 

UWW vice-prezidenti, Rossiya Sport kurashlari Federaciyasi prezidenti, Olimpiada chempioni Mixail Mamiashvili bir vaqtning o'zida UWW Texnik qo'mitasiga ham rahbarlik qilib kelmoqda. Mamiashvili yig'ilishda 2020 yilgi mavsumning qolgan qismi uchun bir nechta variantlarni taqdim etdi. Qatnashchilar bu masalaga avgust oyida yana qaytishlari va o'shanda qachondan musobaqalar restarti bo'lishini muhokama qilishga kelishib olishdi. Har qanday holatda ham 1 sentyabrgacha musobaqalar o'tkazilmasligi qatiy aytildi.

Takidlanishicha, restartdan keyingi birinchi musobaqa - sentyabr hamda oktyabr oylarida kadetlar, o'smirlar va U-23 yoshidagi sportchilar uchun o'tkaziladigan qita chempionatlari bo'ladi. Lekin bu musobaqalar mezbon davlatdagi o'sha paytdagi mavjud epidemiologik vaziyat sabab bekor qilinishi ham mumkin. 

O'smirlar hamda 23 yoshgacha kurashchilar o'rtasidagi jahon chempionatlari esa noyabr oyining oxirlariga mo'ljallanmoqda. Kattalar o'rtasidagi jahon chempionati masalasiga avgust oyida oydinlik kiritiladi. 

Bundan tashqari, 2020 yilda kadetlar, 15 yoshgacha bo'lgan kurashchilar hamda faxriylar o'rtasidagi jahon chempionatlarini o'tkazmaslikka kelishib olindi.  

2021 yilning oktyabr oyida kattalar o'rtasidagi jahon chempionatiga Norvegiya poytaxti Oslo shahri mezbonlik qiladi. Bu yil ham, 2021 yilda ham jahon Kuboklari o'tkazilmaydi. 

SHuningdek, yig'ilishda 2022 yil Senegalning Dakar shahrida o'tkaziluvchi O'smirlar Olimpiadasi masalasida ham so'z bordi. Biroz ajablanarlisi, Afrikadagi Olimpiada dasturida yunon-rim kurashi bo'lmaydi. Dakar Olimpiadasida erkin hamda ayollar kurashi bo'yicha 5 tadan vazn toifasida g'olib va sovrindorlar aniqlanadi. 

Sohil kurashi ilk bor olimpiya o'yinlari sport turi sifatida qayd etildi. Dakardagi musobaqada erkin hamda ayollar kurashi vakillari 4 tadan vazn toifasida gilamga chiqishadi. 

Bundan tashqari, 2022 yili o'tkazilishi rejalashtirilgan U-23 jahon chempionati mezbonligi uchun ikki nomzod tavsiya qilindi. Xorvatiya poytaxti Zagreb hamda Ispaniyaning Pontevedra shaharlari ushbu kichik jahon chempionatini qabul qilish uchun o'zaro kurash olib borishadi.

Yig'ilish so'nggida UWW prezidenti Nenad Lalovich barcha musobaqalar bo'yicha yakuniy qaror dunyodagi epidemiologik vaziyatdan kelib chiqib qabul qilinishini alohida urg'uladi. 

"Biz sportchilar, murabbiylar, hakamlar va muxlislar uchun xavfsiz muhit yuzaga kelgandagina gilamga qaytamiz", — dedi Lalovich.