Sport maktabining eng yaxshilari taqdirlandi + FOTO

Bugungi kunda Urganch shahridagi Sport o'yinlari va engil atletikaga ixtisoslashtirilgan bolalar-o'smirlar sport maktabida sportning 13 turi - futbol, mini futbol, regbi, voleybol, basketbol, qo'l to'pi, engil atletika, stol tennisi, shaxmat, shashka, tennis, chim ustida xokkey va badminton bo'yicha mashg'ulotlar olib boriladi. 

SHug'ullanuvchilarning soni 1584 nafarni tashkil etadi. SHundan 476 nafari qizlardan iborat. O'z navbatida yoshlarga 66 nafar tajribali va malakali trener ustozlik qilmoqda.

Aytish joizki, 2021 yil mazkur mahorat dargohi jamoasi uchun omadli yakunlanmoqda. Agarda, sport maktabi tarbiyalanuvchilari o'tgan yili respublikamiz miqyosidagi chempionat, birinchilik va kubok musobaqalarida hamda xalqaro turnirlarda jami 204 medal bilan yakunlashgan bo'lsa, bu yil uning salmog'i oshib, 331 ta medalga etdi. SHundan, 79 tasi oltin, 76 tasi kumush,176 tasi bronza medallaridir.

Mahorat maskanida yangi yil bayrami arafasida yil sarhisoblariga bag'ishlab taqdirlash marosimi o'tkazish ananaga aylangan. Bu yil ham bundan mustasno bo'lmadi. Marosimda qatnashgan Xorazm viloyati Turizm va sport  bosh boshqarmasi boshlig'i o'rinbosari Nodira Jumaniyazova sport maktabi faoliyati, sportchilarning ko'rsatkichlari xususida iliq fikrlarini bildirib, yangi yil bayrami bilan tadbir ishtirokchilarini qizg'in qutladi.

N.Jumaniyazova viloyatda jismoniy tarbiya va sportning rivoji hamda yosh avlodni sog'lom tarzda voyaga etkazish yo'lida qo'shayotgan sidqidildan xizmatlari sport maktabining direktori Jamoladdin Abdullaev, o'quv ishlari bo'yicha direktor o'rinbosari Azamat Ardjanov, xo'jalik ishlari bo'yicha direktor o'rinbosari Umid Sapaev, metodistlar Vali Sultonov, Amirbek Matquliev, Anvar Alimov, Murodbek Bekchanov, shifokor Intizor Safarova, hamshira Asal Alimova va massajchi Iroda Rustamovani boshqarmaning tashakkurnomasi bilan taqdirladi.

SHuningdek, voha sportini ommaviy axborot vositalarida keng qamrovli yoritib kelayotgan jurnalistlar ham tashakkurnomaga munosib ko'rildi.

O'z navbatida yuqori ko'rsatkichlarga erishgan trener, sportchilar, para sportchilar hamda ishchi xodimlardan bir guruhi tashakkurnoma va sovg'alarga loyiq ko'rildi.

Ikrom XUDOYBERGANOV, Urganch shahridan