Sport maktabining “eng yaxshilar”i taqdirlandi FOTOGALEREYA

Ayni damda ushbu sport maskanida sportning futbol, voleybol, basketbol, qo'l to'pi, engil atletika, stol tennisi, tennis, shaxmat, chim ustida xokkey va badminton turlari faoliyat yuritmoqda. Ularda jami 1600 nafardan ziyod yoshlar o'zlari mehr qo'ygan sport turining sir-asrorlarini qunt bilan o'rganishmoqda. 

SHug'ullanuvchilarning 523 nafarini qizlar tashkil etadi. Murabbiylar soni 61 nafar. Bu erda mashg'ulotlar zamonaviy andozalar asosida, yangi metodikalardan foydalangan holda o'tkazilayotgani, tez-tez musobaqalar uyushtirilayotgani yosh sportchilarning qobiliyatini yuzaga chiqarishda omil vazifasini o'tamoqda. Buning samarasi, sport maktabi vakillari nafaqat viloyat birinchiligi va chempionatlarida, xalqaro va respublika miqyosidagi nufuzli musobaqalarda ham g'olib va sovrindorlar safidan joy olishayotir.  

Tabir joiz bo'lsa, joriy yilda stol tennisi ustalari Nodir Sattorov, Javhar Saidov, Kamron Marimov, Munisa Sultonova, badmintonchilar Anvar Sotimboev, G'affor Jabborov, Umid Hayitboev, Qunduz Ollaberganova, Donogul Sotimboeva, engil atletikachilar Ruslan Gabidullin, Bobur Karimboev, Nurbek Aminboev, tennischi Barno Husainbekova singari ko'plab tarbiyalanuvchilar yuqori ko'rsatkichlarga erishib, sport maktabi nomini ulug'lashdi. Jamoaviy o'yinlar - chim ustida xokkey, futbol, basketbol va gandbol jamoalari azolari ham etiborga molik natijalarga sazovor bo'lishdi.

Mazkur sport dargohida har yili yangi yil bayrami arafasida yil sarhisoblariga bag'ishlab tantanali marosim o'tkazish ananaga aylangan. Unda tarbiyalanuvchilari eng yaxshi natijaga erishgan murabbiy va mutaxassislar munosib taqdirlanadi. Tabiiyki, bu gal ham bundan mustasno bo'lmadi.

Urganch shahridagi “Bek” restoranida bo'lib o'tgan bayram tadbirida Xorazm viloyati jismoniy tarbiya va sport boshqarmasi boshlig'i SHokir Madaminov qatnashib, sport maktabining joriy yilgi faoliyatiga yuksak baho berdi va  mahorat maskaniga 2020 yilda ham ulkan yutuqlar tiladi. 

O'z navbatida sport maktabi direktori Jamoladdin Abdullaev, direktor o'rinbosari Azamat Arjanov, metodistlar Murodbek Bekchanov, Vali Sultonov, Anvar Alimov, Amirbek Matquliev, murabbiylar Olimboy Davletov (futbol), Alisher Erimov (badminton), SHoniyor Ataev (stol tennisi), Sadoqat Qurbonova (voleybol), Sayyora Otajonova, Mansur Bobojonov (ikkalasi gandbol), Temur Ollaberganov (basketbol), Dinora Sobirova (chim ustida xokkey), Baxtiyor Yusupov (engil atletika), Yusufboy Sodiqov (shaxmat), SHerzod Bobojonov (basketbol) va boshqa xodimlarlarni boshqarmaning diplom va sovg'alari bilan taqdirladi.

Albatta, bu rag'bat xorazmlik sportchilarni, ularning murabbiylarini yangi marralar sari etaklashi muqarrar.

Ikrom XUDOYBERGANOV, Urganch shahridan