Sportchi pasporti, Mobil laboratoriya. MOQda yangi metodik qo'llanmalar muhokama qilindi

Unda Bosh kotib Jasur Matchanov, Respublika sport tibbiyoti ilmiy-amaliy markazi direktori, tibbiyot fanlari doktori, professor Abdushukur Sodiqov hamda markaz xodimlari ishtirok etishdi.

Yig'ilish davomida markazning ilmiy loyihalari, sportchilarning matematik modeldan foydalangan holda musobaqalarda qayd etishi mumkin bo'lgan ko'rsatkichlari tahlili, psixodiagnostika, farmakalogiya masalalari muhokama qilindi. Sportchilar uchun ruxsat etilgan dori vositalari ro'yxati tayyorlanganligi, ularning sport turlari bo'yicha ajratib chiqilgani, metodik qo'llanma sifatida chiqarilishi haqida malumot berildi. Unga ko'ra, sport federaciyalari va associaciyalarida faoliyat yuritayotgan terma jamoa shifokor va murabbiylari uchun 8 ta metodik qo'llanma tarqatiladi. SHuningdek, yig'ilishda professor Iskandar Mavlonov so'zga chiqib, professional kadrlar tayyorlash, olib borilayotgan tadqiqot ishlari masalasida gapirib o'tdi.

Aziz Mo'minov esa Respublika sport tibbiyoti ilmiy-amaliy markazi faoliyati, chuqurlashtirilgan tibbiy ko'riklar haqida taqdimot o'tkazdi. Bugungi kunga kelib sportchilarimiz belgilangan reja asosida tibbiy ko'rikdan o'tishmoqda. U o'z chiqishi davomida o'tgan yilda olib borilgan tibbiy tekshiruvlar, sportchilarimizning sog'lig'ida yuzaga kelgan muammolar, ularning echimi va amalga oshirilishi lozim bo'lgan ishlar haqida gapirdi.

Sportchilarimizni Tokio Olimpiadasiga tayyorlashda tibbiy yo'nalishda ham individual tomonlama yondoshuv yo'lga qo'yilgan. Buning uchun ayni paytda «sportchi pasporti» joriy etilmoqda. Unda avvalgi kasalliklar, mashg'ulotlar jadvali, g'alabalari aks etadi. Bu orqali sportchi haqidagi to'liq tasavvurga ega bo'lish mumkin. SHuningdek, uning jismoniy holatidan ham xabardor bo'lib turish imkoniyati paydo bo'ladi.

«Mobil laboratoriya» mavzusida esa Sunnat Yo'lchiev taqdimot o'tkazdi. Unda sportchilarimizning holati, ularga berilayotgan yuklamalardagi natijalar ko'rib chiqildi.

Yig'ilish yakunida MOQ Bosh kotibi Jasur Matchanov mazkur metodik qo'llanmalarni sport federaciya va associaciya vakillariga shunchaki beribgina qolmay, bu bo'yicha ularga batafsil tushuntirish ishlari olib borish lozimligi haqida gapirdi, ushbu yo'nalish yuzasidan o'zining tegishli tavsiyalarini berdi.