Sportning texnik va amaliy turlari rivoji yo'lida

Aholining turli qatlami, xususan, yoshlar qalbiga ona-vatanga mehr va sadoqat hissini singdirish, ularni harbiy-vatanparvarlik ruhida voyaga etkazish, qolaversa, o'g'il-qizlar orasida sportning texnik va amaliy turlarini yanada ommalashtirish, buning barobarida, jismonan va manan barkamol bo'lib o'sishlarini taminlash O'zbekiston Respublikasi mudofaasiga ko'maklashuvchi “Vatanparvar” tashkiloti Markaziy kengashi va uning tasarrufidagi tashkilotlarning asosiy maqsadlari sirasiga kiradi. 

Yaqinda Markaziy kengash tomonidan yoshlar o'rtasida sportning pnevmatik quroldan o'q otish, yozgi biatlon va duatlon turlari bo'yicha yangi uch bosqichli musobaqa  yo'lga qo'yildi. Tabiiyki, bu ko'zlangan ezgu niyatlarning ushalishiga xizmat qilmoqda.

Binobarin, Xorazm viloyatida ushbu musobaqaning birinchi - tuman (shahar) bosqichlari bo'lib o'tdi. Unda “Vatanparvar” tashkiloti viloyat kengashi tizimidagi o'quv muassasalar hamda o'quv sport texnika klublarida tahsil olayotgan va “Yoshlar daftari”ga kiritilgan jami 1248 nafar o'quvchi yuqorida qayd etilgan sport turlari bo'yicha o'zaro bahs yuritishdi.

Tabiiyki, g'olib va sovrindorlar taqdirlanib borildi. Endilikda, ularning eng yaxshilari viloyat bosqichiga shay turishibdi.  

Odilbek IBRAGIMOV (Xorazm viloyat texnik va amaliy sport turlari markazi direktori):

- Mubolag'a emas, bu musobaqa o'ziga xosligi va ahamiyati bilan muhim hisoblanadi. Zero, joylarda o'tkazilgan bellashuvlar ishtirokchilarga ko'tarinki kayfiyat, unutilmas taassurot va quvonchli lahzalarni tuhfa etdi. Uning etiborli jihati yana shundaki, birinchilikda faol qatnashganlardan 672 nafariga sport to'garagi azosi ekanligini tasdiqlovchi guvohnomalar topshirildi. Endilikda, mazkur guvohnoma egalari tashkilotlarimiz qoshida faoliyat yuritayotgan sport sekciyalaridan doimiy ravishda, o'zlariga qulay vaqtlarda foydalanishlari mumkin bo'ladi.

Ha, “Vatanparvar” tashkiloti o'z oldiga xayrli vazifalarni qo'ygan. Bu borada olib borilayotgan izlanishlar esa besamar qolmayapti, albatta. Buning samarasi, bolalar, o'smirlar va yoshlar ushbu tashkilotga o'zgacha mehr bilan qarashmoqda, sportning texnik va amaliy turlariga qiziqishi tobora oshayapti.

Ikrom XUDOYBERGANOV, Urganch shahridan