Stol tennisi. O'zbekiston Kubogi kimga nasib etdi?

Kecha ushbu musobaqa o'z yakuniga etib, g'olib va sovrindorlar nomi malum bo'ldi. Mamlakat kubogida Qoraqalpog'iston Respublikasi, barcha viloyatlar hamda Toshkent shahridan jami 25 ta jamoa bosh sovrin uchun bahs olib bordi. 

Erkaklar o'rtasidagi hal qiluvchi final uchrashuvida Toshkent viloyati jamoasi poytaxtlik stol tennisi ustalarini 3:1 hisobida mag'lub etib, O'zbekiston Kubogi-2023 sohibiga aylanishdi. Qoraqalpog'iston va Samarqand jamoalari shohsupaning uchinchi pog'onasidan joy olishdi. 

Ayollar o'rtasidagi musobaqada Toshkent shahri jamoasi O'zbekiston Kubogini qo'lga kiritdi. Poytaxtlik stol tennischilar murosasiz kechgan final uchrashuvida Namangan jamoasidan 3:2 hisobida ustun kelishdi. Andijon va Toshkent viloyati jamoalari kuchli uchlikka yakun yasab berishdi. 

O'zbekiston Kubogi yakuniga etgach, g'olib va sovrindorlarni tantanali taqdirlash marosimi o'tkazildi. Ushbu tadbirda Sirdaryo viloyati hokimi vazifasini vaqtinchalik bajarib turgan Akmadjon Mahmudaliev, O'zbekiston stol tennisi federaciyasi raisining birinchi o'rinbosari va ijrochi direktori Islomjon Bayxanov, Federaciya raisi o'rinbosarlari Bahrom Saidov, Grigoriy Xvan, Yoshlar siyosati va sport vazirligi Sirdaryo viloyati bo'limi boshlig'i Anvar Bobonov va boshqa mutasaddilar ishtirok etishdi.