“Surxon Arena”da yosh gandbolchilar bellashdi + FOTO

O'zbekiston Respublikasi Sport vazirligi va Gandbol federaciyasining bu yilgi sport musobaqalari taqvimidan o'rin olgan mamlakat birinchiligi 12-19 aprel kunlari tashkil etilib, unda Qoraqalpog'iston Respublikasi, viloyatlar hamda Toshkent shahrining 13 ta yoshlar va 12 ta qizlar jamoalari g'oliblik yo'lida o'zaro bahs olib borishdi. 

Yakuniy natijalarga ko'ra, yoshlar birinchiligida Toshkent shahri terma jamoasi O'zbekiston chempioni nomiga sazovor bo'ldi. Ikkinchi o'rinni Surxondaryo viloyati gandbolchilari egallagan bo'lishsa, faxrli uchinchi o'rin andijonlik yoshlarga nasib etdi.

Qizlar musobaqasida Respublika olimpiya va paralimpiya sport turlariga tayyorlash markazi (ROPSTTM) jamoasi shohsupaning birinchi pog'onasiga ko'tarildi. Andijon viloyati jamoasi ikkinchi, Surxondaryo viloyati jamoasi uchinchi o'ringa loyiq ko'rildi.

CHempionatning taqdirlash marosimida qatnashgan Surxondaryo viloyati Sport boshqarmasi boshlig'i Bekzod Turaboev, Sport o'yinlari bo'yicha Respublika oliy sport mahorati maktabi bosh mutaxassisi Saidxon Boyxo'jaev, SO'TEAISM direktori SHuhrat Aliqulov va boshqalar g'olib va sovrindor sportchilarni qutlab, ularga tegishli darajadagi diplom, medal va sovg'alar topshirishdi.

Ikrom XUDAYBERGANOV, O'zbekiston Jurnalistlar uyushmasi azosi