Tailandda V Atletlar forumi o'tkazildi

Olimpiya birdamligi loyihasi asosida Osiyo Olimpiya kengashi (OOK) tomonidan tashkil etilgan mazkur tadbirda O'zbekiston delegaciyasi ham ishtirok etdi.

Mazkur Forumni o'tkazishdan maqsad Xalqaro Olimpiya qo'mitasi, OOK va uning Atletlar komissiyasi, Milliy Olimpiya qo'mitalari o'rtasidagi aloqalarni yanada mustahkamlash, mintaqada Olimpiya harakatini kuchaytirishdir.

Tadbir davomida oldinga qo'yilgan maqsad va vazifalarni amalga oshirishda har bir MOQning o'rni, uning XOQ hamda OOK qoshida tuzilgan Atletlar komissiyasi o'rtasida bog'lovchi ekani haqida alohida to'xtalib o'tildi. Bu borada Xalqaro chim ustida xokkey federaciyasi prezidenti, OOK Atletlar komissiyasi vice-prezidenti, XOQ azosi Dato Tayab Ikram o'z chiqishida batafsil gapirib o'tdi. 

SHuningdek, u O'zbekiston bilan yo'lga qo'yilgan hamkorlik aloqalari muvaffaqiyatli amalga oshirilayotgani, mamlakatimizda chim ustida xokkey rivoji jadal suratlarda borayotgani, buning natijasida ushbu sport turidagi erkaklar va ayollar terma jamoalarimiz Xanchjou-2022 Osiyo o'yinlariga yo'llanma olgani haqida alohida takidladi. Mazkur hamkorlik OOK rahbariyati va tadbir qatnashchilari tomonidan yuqori baholandi.

Malumki, o'tgan yili mamlakatimizda ham 7 nafar professional sportchilardan iborat Atletlar komissiyasi tashkil etilgan edi. Bu borada yurtimizda ham sportchilarning manfaatlari, huquqlarini himoya qilish va ularga yanada keng imkoniyatlar yaratish, shuningdek, OOK va Olimpiya birdamligi ko'magida talim dasturlarida ishtirok etish borasidagi faoliyatini faollashtirish bo'yicha bir qator ishlar amalga oshirilmoqda.