Tarix sahifalariga muhrlanayotgan 2022 yil o'zbek dzyudosi uchun tarixiy bo'ldi

Tarix sahifalariga muhrlanib borayotgan 2022 yil o'zbek sporti, xususan dzyudosi uchun ham omadli keldi. O'zbekiston tarixda ilk bor kattalar o'rtasidagi jahon chempionatiga mezbonlik qildi. O'zbek dzyudosi tarixida ilk bor terma jamoamizning ikki azosi jahon chempioniga aylandi. Davlat Bobonov (-90 kg) va Muzaffarbek To'raboev (-100 kg) 35-jahon chempionatining oltin medalini qo'lga kiritishdi. Mamlakatimiz Prezidenti SHavkat Mirziyoev shaxsan "Humo Arena"ga tashrif buyurib, final bellashuvlarini kuzatish barobarida shaxsan o'zi Davlat Bobonovning taqdirlash marosimida ishtirok etdi. 

O'zbekiston o'smirlar hamda yoshlar terma jamoalari mos ravishda Bosniya va Gercegoviniya va Ekvador davlatlarida o'tkazilgan jahon chempionatlarida kuchli beshlikdan joy olishdi. O'smirlarimizdan Barchinoy Qodirova, yoshlarimizdan Jahongir Mamatrahimov sharafiga O'zbekiston madhiyasi yangradi. 

Diyora Keldiyorova o'zbekistonlik ayol dzyudochilar orasida birinchi bo'lib o'z vazn toifasi reytingi peshqadamiga aylandi. Davlat Bobonov qatorasiga ikkinchi yil ham -90 kg vazn toifasi reytingini 1-o'rinda yakunladi. Tarixda ilk bor 7 nafar dzyudochimiz jahon reytingida karvonboshilik qilishdi.

Jahon chempioni Muzaffarbek To'raboev O'zbekistonning 2022 yildagi "Eng yaxshi sportchisi" deb topildi. Mamlakatimizning 14 hududida foydalanishga topshirilgan ixtisoslashtirilgan dzyudo maktablari bolalar bilan gavjum.  

Umid qilamizki, 2023 yil ham o'zbek dzyudosi uchun omadli keladi. Dzyudochilarimiz Portugaliyadagi musobaqa bilan mavsumdagi ishtiroklarini boshlashadi. Mart oyida Toshkentda "Katta Dubulg'a" turniri o'tkaziladi. Yilning eng asosiy musobaqasi - Osiyo o'yinlarida sportchilarimiz, xususan dzyudochilarimizdan tarixiy natijalar kutib qolamiz. 

O'zbekiston dzyudo federaciyasi matbuot xizmati