Tarix sahifalariga muhrlanayotgan 2022 yil o'zbek professional boksi uchun qanday keldi?

Tarix sahifalariga muhrlanib borayotgan 2022 yil o'zbek sporti, xususan professional boksi uchun ham omadli keldi. Ikkinchi engil vazn toifasida WBA va IBF yo'nalishlari chempioni Murodjon Ahmadaliev o'z kamarini himoya qildi. U AQSHning Texas shtatida singan qo'li bilan professional ringdagi 11-jangini o'tkazib, amerikalik Ronni Riosni so'nggi 12-raundda texnik nokautga uchratdi. 

Ko'zga ko'ringan bokschilarimizdan SHahram G'iyosov, SHohjahon Ergashev, SHahobiddin Zoirov, Fazliddin G'oibnazarov, Mirazizbek Mirzaxalilov, Elnur Abduraimov, Botir Ahmedov, Iqboljon Xoldarov prof ringdagi navbatdagi janglarini o'tkazishdi. Bobousmon Baturov professional boksda muvaffaqiyatli debyut qildi. Bektemir Meliqo'ziev "buyuk qaytish"ni amalga oshirdi. 

Besh oy ichida 9 ta jang o'tkazib, o'zbek boksida rekord o'rnatgan yosh charm qo'lqop ustamiz Otabek Xolmatov (10, 9KO) 26 mart kuni WBA Eliminator jangida ishtirok etdi. U rossiyalik Andranik Grigoryanni 12 raund to'liq davom etgan jangda hakamlarning yakdil qarori (119-109, 119-109, 118-110) bilan mag'lubiyatga uchratdi. 

Yana bir mag'lubiyat nimaligini bilmay kelayotgan charm qo'lqop ustamiz Isroil Madrimov 9 iyul kuni Londonda franciyalik Mishel Soroga qarshi WBA Eliminator jangida ishtirok etdi. O'n ikki raundga mo'ljallangan jang 2-raundda yakuniga etdi. Soroning qoshi yorilib ketgani uchun tibbiyot xodimlari jangni to'xtatishga qaror qilishdi. Isroilning katta ustunligida o'tayotgan jangda texnik durang natija qayd etildi. 

Tokio Olimpiadasi chempioni Bahodir Jalolov professional boksdagi g'alabali seriyasini 2022 yilda ham davom ettirdi. Surxon o'g'loni bu yil hisobidan prof ringda 3 ta jang o'tkazdi. Dastlab polshalik Kamil Sokolovski mag'lub etildi. Jalolov 8 raundga mo'ljallangan jangning 5-raundida chap qo'ldagi kuchli zarbasi evaziga raqibini yiqitdi. Keyin AQSHning Nyu-York shtati Verona shahrida belgiyalik Jek Mulovayi 8-raundda mag'lub etildi. Faoliyatidagi hisob bo'yicha 12-jangi AQSHning Kaliforniya shtatida amerikalik Kyortis Xarperga qarshi bo'lib o'tdi. 10 raundga mo'ljallangan jang 4-raundda Bahodirning g'alabasi bilan yakuniga etdi. 

Bundan tashqari O'zbekistonda promouterlik kompaniyalari faoliyati ham yo'lga qo'yildi. Ular orasida LIFT Promotion promouterlik kompaniyasini alohida aytish o'rinli bo'ladi. Kompaniya tomonidan ikki bor muhtasham "Humo" arena saroyida professional boks oqshomlari o'tkazildi. "Yunusobod" sport majmuasida, shuningdek Navoiyda prof boks kechalari tashkil etildi. 

Darvoqe, bokschilarimizning shaxsiy hayotlarida ham o'zgarishlar bo'ldi. Murodjon Ahmadalievga havas qilib, Isroil Madrimov, SHahram G'iyosov va Bobousmon Baturov bo'ydoqlik bilan xayrlashdi. 

Keling niyat qilaylik, ostonada turgan 2023 yil professional bokschilarimiz yanada omadli kelsin. CHarm qo'lqop ustalarimiz birin-ketin jahon chempionlik kamarlarini O'zbekistonga taqdim etishsin. 

O'zbekiston professional boks federaciyasi matbuot xizmati