Tennis malikalarimizning har ikkisi Uimbldon finalida!

Musobaqaning asosiy to'r bahslari 29 iyun kuni boshlanib, 12 iyulga qadar davom etadi. Biz uchun ahamiyatlisi, ayollar o'rtasidagi saralash turnirida mamlakatimizning ikki tennis malikasi ham o'z omadini sinab ko'rmoqda. Kecha ular saralashning 1/2 finalida kortga chiqishdi. 

O'zbekistonning ikkinchi raketkasi Mariya Timofeeva saralashning 1/2 finalida WTA reytingida 144-o'rinda borayotgan ukrainalik Veronika Podrezga qarshi bahs olib bordi. To'qson besh daqiqa davom etgan uchrashuvda saralash turnirida birinchi raqam ostida tasniflangan vakilamiz ortiqcha qiyinchiliksiz raqibasini taslim etdi - 6/4, 6/2. Bu tennischilarning o'zaro o'tkazgan ilk uchrashuvi bo'ldi. Ikkala tennischi ham 3 tadan qo'shxatoga yo'l qo'ydi. Eys zarbalari bo'yicha kichik ustunlik Mariya tomonida bo'ldi - 2 ga 1. Mariya ayni paytda WTA reytingida 92-o'rinni egallab turibdi.  

Mamlakatimizning uchinchi raketkasi Polina Kudermetova ham saralashning hal qiluvchi finaliga yo'l oldi. Saralash turnirida 11-raqam ostida tasniflangan Polina 1/2 finalda WTA reytingida 320-pog'onadan joy olgan amerikalik Klerve Ngunuega qarshi kortga chiqdi. Bor yo'g'i 45 daqiqa davom etgan uchrashuvda Kudermetova 6/1, 6/2 hisobida zafar quchdi. Polina 3, Klerve 2 ta eys zarbasini amalga oshirdi. Qo'shxatolar bo'yicha AQSH vakilasi mutlaq "ustunlik" qildi - 4 ga 0. Polina Kudermetova ayni paytda dunyoning 116-raketkasi bo'lib turibdi. Bu tennischilarning o'zaro o'tkazgan ilk uchrashuvi bo'ldi. 

Bugun har ikki tennischimiz asosiy to'rga yo'llanma beruvchi saralashning final bahsida kortga chiqadi. Mariya Timofeeva britaniyalik 34 yoshli Xezer Uotsonga, Polina Kudermetova esa rossiyalik Alina CHaraevaga qarshi kortga chiqadi. Uotson WTA reytingida 491, CHaraeva esa 120-o'rinni egallab turibdi Har ikki tennischimiz ishtirokidagi uchrashuv bizning vaqt bilan soat 17:00da boshlanadi.