Terens Krouford faoliyatidagi eng qiyin raqibni aytdi

Bu Errol Spens yoki mutlaq jahon chempionligi uchun jangda mag'lub etilgan Saul "Kanelo" Alvares emas. Amerikalik o'z faoliyatidagi eng qiyin raqib sifatida kubalik taniqli bokschi, Olimpiada chempioni, ikki vazn toifasida jahon chempioni Yuriorkis Gamboani aytdi. Krouford uni 2014 yil iyun oyida WBO engil vazn toifasidagi kamarining birinchi himoyasida to'qqizinchi raundda texnik nokaut bilan mag'lub etgandi.

"Gamboa. Bu jang engil vazn toifasida bo'lgandi", - dedi Krouford taniqli bloger Eydin Rossning strimida.

SHuningdek, engil, birinchi yarim o'rta, yarim o'rta, birinchi o'rta va ikkinchi o'rta vazn toifasida jahon chempionligini qo'lga kiritgan amerikalik bokschi faoliyatining boshida engil vaznda ishtirok etish juda qiyin bo'lganini tan oldi.

"Men gavda jihatidan hozirgisidan kichikroq edim, lekin bu vaznni yig'ish uchun o'zimni qiynadim. Birinchi yarim o'rta vaznda ham xuddi shunday bo'ldi", - deya tan oldi Krouford va ikkinchi o'rta vaznni o'zi uchun eng qulay deb atadi.

Ushbu vaznda Krouford joriy yilning sentyabr oyida atigi bitta jang o'tkazgan. U Saul "Kanelo" Alvaresni mag'lub etib, undan ikkinchi o'rta vazn toifasida mutlaq jahon chempioni unvonini tortib olgandi. Bu Kroufordni uchta vazn toifasida tarixdagi yagona mutlaq jahon chempioniga aylantirdi. 

Yaqinda Terens Krouford faoliyatini yakunlaganini elon qildi. U intervyuda Alvares bilan revansh haqida hech qanday taklif bo'lmagani va faoliyatini davom ettirish uchun sabab ko'rmayotganini aytdi.

"Yo'q. Hech qachon, - dedi Krouford revansh takliflari haqida. - Bu ish yopilgan. Agar shartnomada revansh sharti bo'lganida, unda men uni bajarishim kerak edi, lekin hammasi tugadi. Endi mening isbotlaydigan va erishadigan narsam qolmadi.

Malumot uchun, 2024 yilning avgust oyida Isroil Madrimov va Terens Krouford o'rtasida chempionlik jangi tashkil etilgan edi. O'shanda 12 raund to'liq davom etgan jangda amerikalik bokschi ochkolar hisobiga ko'ra g'alaba qozongandi.