Terma jamoa bosh murabbiyi karantinni qanday o'tkazmoqda?

Xabaringiz bor, koronavirus pandemiyasi sabab yuzaga kelgan hozirgi karantin holatida davlat va nodavlat jamoat tashkilotlari, turli muassasalar o'z ish faoliyatlarini masofaviy tarzda olib borishyapti. Barchamizdan uyda qolish so'ralmoqda. Zero, faqat shu yo'l orqaligina tezroq koronavirus balosidan qutulish mumkin.  

Xususan, O'zbekiston sport kurashlari associaciyasida ham ish to'xtab qolgani yo'q. Bugungi axborot texnologiyalari yashin tezligida taraqqiy etib borayotgan zamonamizda associaciya rahbariyati, xodimlar, murabbiylar faoliyati masofadan turib davom ettirilyapti. 

Jumladan, yunon-rim kurashi bo'yicha O'zbekiston kattalar terma jamoasi bosh murabbiyi Ravshan Ro'ziqulov ham associaciyaning katta oilasi uchun ochilgan maxsus telegram kanalida sportchilarimizning kunlik holatini nazorat qilib boryapti. 

"Terma jamoa azolariga uy sharoitida o'tkaziladigan maxsus mashg'ulotlar berib boryapmiz. SHifokorlar har kuni ikki mahal kurashchilarimizning salomatligi, tana harorati, qon bosimini nazorat qilishyapti. Barcha ishlar masofaviy tarzda olib borilyapti. Karantin ham biz uchun bir sinov. O'zim oilam davrasida kunlarni mazmunli o'tkazish uchun harakat qilyapman. Farzandlarim bilan turli o'yinlar o'ynayapmiz. Engil mashg'ulot o'tkazyapmiz. Masofaviy yo'lga qo'yilgan maktab darslarini birgalikda bajaryapmiz. Fursatdan foydalanib, aziz hamyurtlarimizni uyda qolishga, zarurat bo'lmasa ko'chaga chiqmaslikka chaqiraman", - deydi Ravshan Ro'ziqulov.