Terma jamoa shifokori: "Dzyudochilar doimiy nazoratda"

Ushbu balo tufayli barcha katta-kichik musobaqalar va hatto to'rt yilda bir marotaba o'tkaziladigan Olimpiada ham bekor qilindi. Mana deyarli bir oydirki, musobaqalar yo'q, sportchilar esa o'z uylarida, karantin holatida mashg'ulotlarni davom ettirishyapti. 

Tabiiyki, bu holatda terma jamoa murabbiy va shifokorlari zimmasiga katta masuliyat yuklanadi. Biz ayni mavzu yuzasidan terma jamoamiz shifokori Aziz Qayumovdan intervyu oldik.     

- Aziz aka, bugungidek sinovli kunlarda sportchilarimiz uy sharoitida mashg'ulotlarni davom ettirishyapti. Xo'sh, dzyudochilar karantinni qanday o'tkazishyapti?

- Haqiqat ham bugungi kun har birimiz uchun sinovli hisoblanadi. SHu kunlarda davlatimiz rahbari takidlaganlaridek, uyda o'tirib, karantin qoidalariga rioya qilishimiz kerak. SHunga qaramay, olimpiya o'yinlariga tayyorgarlik jarayoni bir zumga ham to'xtab qolmasligi zarur. Terma jamoa azolari uylarida bosh murabbiyning ko'rsatmalariga binoan o'z tayyorgarlik jarayonlarini davom ettirmoqdalar. Qolaversa, dzyudochilarimiz gigiena qoidalariga rioya qilish bo'yicha o'zlari namuna bo'lib, targ'ibot ishlarida faol qatnashishyapti. Bu murojaatlarimiz federaciyaning rasmiy telegram saxifasiga muntazam yuklanib borilyapti.

- Dzyudochilarimizning salomatligi joyidami? Ulardan hech qanday shikoyat bo'lmadimi?

- O'zbekiston Milliy olimpiya qo'mitasi qoshidagi Respublika sport tibbiyoti ilmiy-amaliy markazi tomonidan taklif etilgan ko'rsatmalarga asosan kunlik gigiena qoidalariga amal qilgan holda hayot tarzini olib borishlari, tana haroratini o'lchab turishlari va shikoyatlari bo'yicha alohida tuzilgan telegram kanalga yozib borishlari takidlangan. Bu ishlarning bari amalga oshirilmoqda. SHu yig'ilgan malumotlarga ko'ra hozirga qadar terma jamoa azolari sog'-salomat.

- Ularga shifokor sifatida qanday tavsiyalar beryapsiz?

- SHifokor sifatida davlatimiz tomonidan tadbiq etilgan karantin qoidalariga rioya qilishlarini talab qilaman. SHu bilan birga gigiena qoidalarini nazarda tutgan holda hayot tarzini olib borishlarini so'rab qolardim.