Terma jamoamiz Abu-Dabi shahriga etib bordi. Bugun qura, ertaga musobaqa!

Yilning so'nggi "Katta Dubulg'a" musobaqasida dunyoning 5 qitasi 41 davlatidan jami 225 (137 erkak, 88 ayol) nafar dzyudochi medallar uchun tatamiga chiqadi. Yurtimiz sharafini Ilias Iliadis va Bekzod To'raboev murabbiyligidagi 10 nafar dzyudochimiz himoya qiladi. Ular orasida Tokio Olimpiadasi sovrindori Davlat Bobonov ham bor. 

Abu-Dabi tatamilarida London-2012 Olimpiadasida oltin, Rio-2016 kumush, Tokio-2020 Olimpiya o'yinlarida bronza medali sohibi bo'lgan gruziyalik Lasha SHavdatuashvili, Tokio Olimpiadasining bronza medali sovrindori, jahon chempioni, belgiyalik Mattias Kasse, Tokio Olimpiadasining oltin (jamoaviy) va kumush (yakkalik) medali egasi, franciyalik Amandin Bushar singari dzyudo yulduzlari BAA poytaxtiga etib borishgan. 

Yaponiya terma jamoasi tarkibidan ikki ayol dzyudochi o'rin olgan. Kunchiqar yurtning erkaklar terma jamoasi BAAga kelmaydi. Franciya 11 erkak, 10 ayol, Rossiya 13 erkak, 9 ayol, Mo'g'uliston 10 erkak, 10 ayol, yon qo'shnilarimiz Tojikiston 10 erkak, Qirg'iziston 4 erkak dzyudochi bilan musobaqada qatnashadi. Qozog'iston dzyudochilari turnirda ishtirok etishmaydi. 

Terma jamoamiz delegaciyasi ham Abu-Dabiga etib bordi. Bugun Toshkent vaqti bilan soat 15:00da "Katta Dubulg'a" turniriga qura tashlash marosimi bo'lib o'tadi. Ertaga esa engil vazn toifasidagi bellashuvlar bilan musobaqaga start beriladi.              

Abu-Dabi "Katta Dubulg'a"da qatnashadigan tarkibimiz:

-52 kg: Diyora Keldiyorova

-60 kg: Dilshodbek Baratov

-66 kg: Dilshodbek Yo'ldoshev 

-73 kg: Hikmatulloh To'raev

-81 kg: Suhrob Tursunov, Arslonbek Tojiev

-90 kg: Davlat Bobonov 

-100 kg: Muzaffarbek To'raboev, Aqlmurod Xudoyberdiev

+100 kg: SHohruh Mamarasulov