Terma jamoamiz medallar jamg'arish bo'yicha 44-o'rinda

Terma jamoamiz dzyudochilarimiz Diyorbek O'rozboev va Rishod Sobirov qo'lga kiritgan ikkita bronza medali bilan umumjamoa hisobida 207 ishtirokchi davlat orasida 44-o'rinni egallab turibdi. Bir kun avval biz 39-pog'onadan joy olgandik.

Olimpiadaning beshinchi kungi bahslaridan so'ng AQSH terma jamoasi medallar jamg'arish bo'yicha peshqadamlikni o'z qo'lida saqlab turibdi. Okean orti jamoasi jami 32ta medalni qo'lga kiritib ulgurdi. SHulardan 11tasi oltin, 11tasi kumush, 10tasi bronza medallaridir.

Ikkinchi o'rindagi Xitoy terma jamoasida 10ta oltin medal bor. Kumush medallar soni 5tani, bronza esa 8tani tashkil qilmoqda. Oltita oltin, bitta kumush, 11ta bronza medaliga ega Yaponiya terma jamoasi kechagi muvaffaqiyatli ishtirokdan so'ng uchinchi o'ringa ko'tarilib oldi. To'rtinchi pog'onadagi Avstraliyada 5ta oltin, 2ta kumush, 5ta bronza medali bor.

SHu kungacha 28ta davlat terma jamoalari kamida bir nafar Olimpiada chempioniga ega bo'lib ulgurdi. Qirq ikkita terma jamoa esa hisobida kamida bittadan kumush medal bor. Ellik bitta mamlakat jamoasi esa kamida bittadan bronza medaliga ega bo'lib turibdi.