Tokio-2020 Olimpiadasi startiga 100 kun qoldi!

2021 yilning 23 iyul sanasida kun chiqar yurt poytaxti XXXII yozgi Olimpiya o'yinlarini qabul qiladi. Bugun 1 yilga surilgan mazkur Olimpiada startiga roppa-rosa 100 kun qoldi. 

O'zbekiston Respublikasi Prezidentining 2017 yil 9 martdagi “O'zbekiston sportchilarini 2020 yil Tokio shahri (Yaponiya)da bo'lib o'tadigan XXXII yozgi Olimpiya va XVI Paralimpiya o'yinlariga tayyorlash to'g'risida”gi PQ-2821-son qaroriga muvofiq Milliy Olimpiya qo'mitasi Turizm va sport vazirligi bilan hamkorlikda bevosita hukumatimizning qo'llab-quvvatlashi ostida katta hajmdagi ishlarni amalga oshirmoqda. Hozirda bir qator sport turlarida vakillarimiz Tokio Olimpiadasiga qimmatli reyting ochkolarini yig'ib kelishmoqda.

Nasib qilsa, joriy yil bo'lib o'tadigan Olimpiya o'yinlarida O'zbekiston terma jamoasi Rio-de-Janeyrodagidan ham yuqori natijalarni qayd etib, yurtdoshlarimizga unutilmas g'alabali onlarni taqdim etishadi. Eslatib o'tamiz, hozirda delegaciyamiz hisobida Tokio-2020 Olimpiya o'yinlari uchun 36 ta, Paralimpiya o'yinlariga esa 16 ta yo'llanma mavjud.