Tokio-2020: Olimpiya o'yinlarida hakamlarimiz ham ishtirok etishadi

Ushbu maqolamizda ular bilan tanishtiramiz.

Tohir G'ulomov (sport kurashlari)

Sport kurashlari bo'yicha tajribali hakamimiz bir necha yildirki, ushbu sport turida dunyoning eng kuchli referilaridan biri sifatida etirof etiladi. Pekin-2008, Rio-2016 Olimpiya o'yinlarida ishlagan hakamimiz endilikda Tokio-2020 Olimpiadasini ham o'z xotirasiga muhrlab qo'yadigan bo'ldi. Tohir Gulamov shu paytgacha 23 ta jahon chempionatida ham faoliyat olib borgan bo'lib, 2014 yil sport kurashlari bo'yicha dunyoning eng yaxshi hakami deb topilgan.

Ramziddin Saidov (dzyudo)

London-2012 da dzyudochi sifatida ishtirok etgan Saidov endi hakam sifatida Olimpiadaga tashrif buyurmoqda. Uning bellashuvlarni oqilona boshqarib borishi sabab Xalqaro dzyudo federaciyasi hamyurtimizga eng muhim va markaziy bellashuvlarni ishonib topshirmoqda. Eslatib o'tamiz, boshqa bir hakamimiz Vyacheslav Pereteyko Paralimpiya o'yinlarida ishlashi belgilab qo'yilgan.

Aida Hasanova (qilichbozlik)

Qilichbozlik sportida hakamlarning Olimpiadada ishtirok etishi uchun o'ziga xos talablar mavjud. Buning uchun hakamlar yillar davomida Olimpiada darajasigacha turli musobaqalarda ochko to'plab kelishadi. Rio-2016 ga bir qadam etishmagan Hasanova Tokioda o'z orzusiga erishdi.

Zuhra Abdullaeva (og'ir atletika)

Og'ir atletika olamida o'z o'rniga ega Abdullaeva uchun bu dastlabki Olimpiada emas. Hamyurtimiz Rio-2016 Olimpiya o'yinlarida ham bahslarni odillik bilan boshqarib borgan. Xalqaro tashkilot uning ishiga doimo yuqori baho berib kelgan va Tokio-2020 Olimpiadasiga ham Abdullaevani taklif qildi.

Evgeniya Dedusheva (tennis)

Tennis bo'yicha “Katta dubulg'a” va boshqa turkumga kiruvchi bir qator turnirlarda muvaffaqiyatli ishlab kelayotgan Evgeniya Dedusheva o'zi ishlagan nufuzli musobaqalar orasiga Olimpiya o'yinlarini ham qo'shib qo'ymoqda. 30 yoshli hakamimiz Xalqaro tennis federaciyasining bronza ko'krak nishoniga ega.

SHuningdek, tennisdagi yana bir hakamimiz Dmitriy Duranidis Paralimpiya bahslarini boshqarib borishi kutilmoqda.

Olga Bloxina (triatlon)

Olga Bloxina “World Triathlon TO Level2” sertifikatiga ega bo'lgan hakam hisoblanadi. U o'tgan Rio-2016 Paralimpiya o'yinlarida ishtirok etgan. Endilikda Tokio-2020 Olimpiya o'yinlarida ham faoliyat olib boradigan bo'ldi.

SHerzod Inog'omov (suzish) va Elmira Fayzullaeva (sinxron suzish)

Ko'plab xalqaro musobaqalarda tajriba orttirib borayotgan ushbu hakamlarimiz ham Tokio-2020 da faoliyat olib boradigan referilar qatoridan joy olishdi.

Lyudmila Li (sport gimnastikasi) va Taliya Abduramanova (badiiy gimnastika)

Har ikki vakilimiz hakamlikdan tashqari o'z yo'nalishlari bo'yicha terma jamoamizda katta murabbiy sifatida ham faoliyat olib borishadi. Tokio-2020 Lyudmila Li uchun debyut emas. U bungacha Rio-2016 va kattalar o'rtasidagi jahon chempionatlari orqali ulkan tajriba orttirib ulgurgan.

O'zbekiston Milliy Olimpiya qo'mitasi barcha atletlarimiz qatori hakamlarimizga ham bo'lajak Olimpiya o'yinlarini muvaffaqiyatli o'tkazib olishlarini tilaydi.