Tokio-2020. O'zbekistonlik sportchilarning 7 avgust kungi ishtiroki yakunlandi

Kun davomida Olimpiadada ishtirok etgan o'zbekistonlik sportchilarning ishtiroklariga oid malumotlarni ushbu sahifada onlayn ravishda kuzatib borish mumkin bo'ldi.

Kanoeda eshkak eshish: Dilnoza Rahmatova va Nilufar Zokirova (juftlik) (B finalda 3-o'rin)

Badiiy gimnastika: guruh bahslari (saralashda 9-o'rin)

Zamonaviy beshkurash: Aleksandr Savkin (32-o'rin)

Engil atletika: Safina Sadullaeva (final, 6-o'rin)

SHu tariqa, o'zbekistonlik sportchilarning bugungi ishtiroki yakunlandi. 

17:17. Safina Sadullaeva 1.98 metr balandlikni zabt eta olmadi va musobaqadagi ishtirokini medalsiz yakunladi. Sportchimizdan yomon bo'lmagan ishtirok.

17:02. Safina 1.93 va 1.96 m balandlikni bajardi va o'z shaxsiy rekordini takrorladi.

15:56. Safina bahslarga 1.89 m. balandlikdan qo'shildi. U dastlabki urinishdayoq ushbu balandlikni zabt etdi. 

15:42. Engil atletikaning balandlikka sakrash bahslari boshlandi. Unda hamyurtimiz Safina Sadullaeva medallar uchun kurash olib boradi. 

15:23. Safina Sadullaevaning final bahsiga oz vaqt qolmoqda.

15:09. Beshkurashchimiz Aleksandr Savkin chavandozlik bahslaridan so'ng 31-o'ringa ko'tarildi. So'nggi chiqish oldidan Savkinda 718 ochko bor. Birozdan so'ng so'nggi bosqich boshlanadi.

13:41. Savkin chavandozlik yo'nalishida 279 ochko jamg'ardi.

11:49. Beshkurashchimiz Aleksandr Savkin suzish bahslarida qatnashdi. U 200 metrga suzish bellashuvlarida 2:06.64 natija ko'rsatdi va 297 ochko to'pladi. Ushbu natijadan so'ng Savkin 36-o'rindan 35-pog'onaga ko'tarilishga erishdi. Malumot uchun, beshkurash bahslarida 36 nafar sportchi qatnashmoqda.

8:53. Afsuski, gimnastikachi qizlarimiz uchun saralash bahslari alamli tarzda yakunlandi. Vakilalarimiz saralashni 9-o'rinda tugatishdi. Agar yana bir ball qo'lga kiritilganida biz kuchli sakkizlikka ilinardik va finalda ishtirok etish huquqini qo'lga kiritardik. Mezbon faktori bu erda rol o'ynadi deyishimiz mumkin. Yaponiyaliklar final yo'llanmasini qo'lga kiritishdi.

Biznikilar zaxirada. Agar finalga yo'l olgan ishtirokchilar bilan qandaydir holat ro'y beradigan taqdirda, qizlarimiz finalga chiqishlari mumkin. Ammo, bu 0, 001 foiz ehtimolda. 

7:57. Yana bir malumot: gimnastikachi qizlarimizni guruh mashqlariga tayyorlagan murabbiy Ekaterina Pirojkova koronavirus sabab bugun Olimpiya o'yinlarida ishtirok etmadi. Qizlarimiz o'z murabbiylarisiz Olimpiadada chiqish qilishdi.

7:52. Gimnastikachilarimiz ikkinchi chiqishlarini yakunlashdi. 36.900 ball bilan. Endi qolgan jamoalarning ishtirokini kutamiz. Umid qilamizki, qizlarimiz TOP-8da qolishadi va final bahslariga yo'llanmani qo'lga kiritishadi.

7:38. Kanoechi qizlarimiz Dilnoza Rahmatova va Nilufar Zokirova B finalda marraga uchinchi bo'lib etib kelishdi. SHu tariqa, qizlarimiz Olimpiadada umumiy hisobda 11-o'rinni egallashdi...

7:11. Gimnastikachilarimiz dastlabki chiqishni 5-o'rinda yakunladilar. Birozdan so'ng ikkinchi mashqlar boshlanadi. Ikkinchi mashq yakuniga ko'ra qizlarimiz kuchli sakkizlikda qola olishsa, ertaga o'tkaziladigan final bahslariga yo'llanmani qo'lga kiritishadi. 

6:39. Badiiy gimnastika bahslarida 14 ta terma jamoa ishtirok etmoqda. Qizlarimiz birinchi chiqish (to'p bilan mashqlar) yakuniga ko'ra 42.100 ball jamg'arishdi.

6:12. Badiiy gimnastikachilarimiz jamoaviy mashqlarda o'z ishtiroklarini boshlashdi. 

5:51. Kanoechi qizlarimiz Dilnoza Rahmatova va Nilufar Zokirova 5 ta jamoa ichida marraga beshinchi bo'lib etib kelishdi va afsuski medallar uchun kechadigan finalga yo'l olishmadi. Ular endi birozdan so'ng 9-o'rin egasini aniqlab beruvchi bahslarda startga chiqishadi.

5:49. Assalomu alaykum hurmatli sport ishqibozlari. O'zbekistonlik sportchilarning ishtirokiga bag'ishlangan matnli translyaciyamizni boshlaymiz. 

Kun davomida quyidagi sportchilarimiz Olimpiya o'yinlarida ishtirok etishadi:

5:30 - Kanoeda eshkak eshish: Dilnoza Rahmatova va Nilufar Zokirova (juftlik)

6:00 - Badiiy gimnastika: guruh bahslari

7:35 - Kanoeda eshkak eshish: Dilnoza Rahmatova va Nilufar Zokirova (juftlik, final)

10:35 - Zamonaviy beshkurash: Aleksandr Savkin

15:35 - Engil atletika: Safina Sadullaeva (final)

Soatlar Toshkent vaqti bilan ko'rsatilgan