Tom Aspinall va Siril Gan ilk qo'shma matbuot anjumanida ishtirok etishdi

"Agar yaxshi zarba bera olsam, har qanday odamni nokautga uchratishim mumkin, Siril ham bundan mustasno emas. Albatta, biz uning parterdagi kamchiliklari borligini bilamiz. Lekin ishonchim komil, u janggacha bu kemtikni bartaraf eta oladi. Bu MMA qoidalariga muvofiq jang bo'lib, unda hamma narsa sodir bo'lishi mumkin. Ikkalamiz ham bir-ikki yil oldin o'tkazgan janglarimiz bilan taqqoslaganda o'sishga erishdik. Buning natijasi o'laroq chempionlik jangiga etib keldik. Sirilda ikkita chempionlik jangi bo'lgan, men esa vaqtinchalik kamar sohibi edim. Bu kamarni ikki bor himoya qildim. Hozir amaldagi chempionman. Biz og'ir vaznli aralash yakkakurash ustalarining yangi avlodini taqdim etamiz va odamlar biz bilan o'n yil oldingi yigitlar o'rtasidagi katta farqni ko'rishadi. Bu yigit juda yaxshi, u men uchun haqiqiy sinov bo'ladi, lekin men bunga to'liq tayyor bo'laman va har qanday bosimga bardosh beraman", - dedi Jon Jonsdan "meros" qolgan chempionlik kamari sohibi britaniyalik Tom Aspinall. 

"Men og'ir diviziondagi barcha jangchilardan farq qilaman. Hozir bor etiborimni bo'lajak jangga qaratganman. Tom chempion va u bilan jang qilish eng qiyin sinov. Eng yaxshi bo'lish uchun eng yaxshilarni mag'lub etish kerak, eng yaxshisi esa chempionlik kamariga ega bo'lgan odam. Tom juda xavfli va har tomonlama rivojlangan jangchi, u chindan ham kuchli. Uning jang olib borish uslubi o'ziga xos, lekin men haqimda ham shunday deyish mumkin. Menda ham o'zimga xos uslubim bor, unga tushadigan kalitlarni shunchaki tanlab bo'lmaydi. SHunday ekan, jangning qiziqarli bo'lishi kutilmoqda. Bu faoliyatimdagi eng muhim jang va men g'alaba qozonishga tayyorman", - deya muxlislarga vada berdi franciyalik davogar Siril Gan.

Malumot uchun, evropalik bu ikki og'ir vazn aralash yakkakurash ustalarining chempionlik jangi 25 oktyabr kuni BAA poytaxti Abu-Dabi shahrida bo'lib o'tadigan UFC 321 turnirining asosiy to'qnashuviga aylanadi.