To'raboev faxriylar o'rtasida jahon chempionatida shohsupaga ko'tarilgan ilk o'zbekistonlik!

Takidash joiz, O'zbekiston terma jamoasi ilk bor faxriylar o'rtasidagi jahon chempionatida ishtirok etdi. O'zbekiston dzyudosi tarixida shu kungacha hech kim faxriylar o'rtasidagi jahon chempionatida tatamiga chiqmagandi. Ilk ishtirok terma jamoamizga kumush medal keltirdi. Musobaqaning so'nggi kuni -90 kg vazn toifasidagi bellashuvlarda yurtimiz sharafini himoya qilgan Bekzod To'raboev finalgacha mag'lubiyatsiz etib borib, jahon vice-chempioniga aylandi. 

O'zbekiston dzyudo federaciyasi raisi o'rinbosari hisoblangan Bekzod To'raboev finalga qadar ispaniyalik Karlos Alvares, braziliyalik Jonatas Barboza, ukrainalik Dmitro Kalchenkoni mag'lubiyatga uchratgan edi. Mezbonlar vakili Bruno Silvaga qarshi kechgan final bahsida To'raboevga belidan olgan jarohati pand berdi. 

Jahon chempionatining birinchi kuni hamyurtlarimizdan Jamshid Fayziev (-100 kg) bronza medali uchun kechgan bellashuvda raqibiga imkoniyatni boy berib, kuchli beshlikdan joy olgandi. Kecha esa -81 kg vazndagi dzyudochimiz Jahongir Eshmanov bronza yo'lidagi o'tish bahsida mag'lub bo'lib, ettinchi o'rinni egalladi. 

Jahon chempionatida ishtirok etgan terma jamoamiz:

-81 kg: Farruh Boboev

-81 kg: Jahongir Eshmanov

-90 kg: Bekzod To'raboev

-100 kg: Jamshid Fayziev 

-100 kg: Muxtorxo'ja Tulaev 

 Malumot uchun, bugun kechqurun soat 01:30da O'zbekiston faxriy dzyudochilar delegaciyasi Lissabondan Toshkentga qaytib keladi.