“Toshkent shahar spartakiadasi”ning ochilish marosimi o'tkazildi

Mazkur musobaqa O'zbekiston Respublikasi Jismoniy tarbiya va sport vazirligi tomonidan Toshkent shahrida hayotga katta umid bilan kirib kelayotgan yoshlarni zararli odatlardan asrash, ularga o'z qobiliyat va istedodlarini ro'yobga chiqarishlari uchun keng imkoniyatlar yaratish, ular o'rtasida iqtidorli sportchilarni saralab olish hamda maqsadli tayyorlash tizimini takomillashtirish borasida, hamda poytaxt yoshlar terma jamoasini shakllantirish maqsadida tashkil etildi.

Kecha, 3 noyabr kuni “Universal” sport saroyida ushbu sport musobaqasining tantanali ochilish marosimi o'tkazildi.

Spartakiadada 18 yoshgacha bo'lgan Toshkent shahrining tuman bosqichlaridan saralangan ikki ming nafardan ziyod sportchi badiiy gimnastika, basketbol, boks, badminton, voleybol, dzyudo, engil atletika, qo'l to'pi, stol tennisi, suzish, sport gimnastikasi, taekvondo WTF, karate WKF, kurash, qilichbozlik, shaxmat, yunon-rum va erkin kurash sport turlari bo'yicha raqobatlashmoqda.

“Toshkent shahar spartakiadasi”ning tantanali ochilish marosimidan so'ng, taekvondo WTF bo'yicha final janglari o'tkazildi.

Ushbu musobaqaning o'g'il bolalar o'rtasidagi bahslarda Ravshan Ikromov, Azimbek Rustamov, Mirsaid Ergashev, Jamol Yo'ldoshev shohsupaga ko'tarildi.

Qizlar o'rtasida Madinabonu Alimova birinchi, SHahzoda SHaripova ikkinchi, Xurshida To'raboeva hamda Madina Faxriddinova uchinchi pog'onadan joy oldi.